UWT. PWANI WAMPONGEZA RAIS MAGUFULI.

 Umoja wa Wanawake wa CCM Tanzania (UWT) mkoani Pwani, umempongeza Rais Dk. John Magufuli kwa kasi yake ya utekelezaji katika sekta mbalimbali,   ikiwemo miradi ya REA awamu ya III kwa vijiji 150 na mradi mkubwa wa Rufiji Hydropower utakaozalisha 2,100 MW baada ya kukamilika.

Aidha wameishukuru serikali ya awamu ya tano kwa kutenga bajeti ya bilioni 12.4 kwa ujenzi wa vituo 18 vya afya mkoa mzima na hospital tatu Kibaha Mjini, Kibaha Vijijini na Kibiti. 

Mbunge wa viti maalum Mkoa wa Pwani, ambae pia ni Naibu Waziri wa Nishati, Subira Hamisi Mgalu alisema anampongeza Rais Dkt. Magufuli kutokana na uongozi wake kwa kutekeleza ahadi mbalimbali kwa wananchi.

 Alisema wakati anaingia madarakani Mh. Rais Magufuli alikuta asilimia 38 ya wanaopata huduma za umeme lakini sasa ni asilimia 60 wamepata umeme kupitia miradi iliyokaribu nao, na miradi ya umeme vijijini.

Subira alielezea, kuna REA awamu ya tatu ambayo inaendelea ambapo vijiji 7,873 vilikuwa havina umeme lakini kwa kazi inayoendelea mzunguko wa kwanza vijiji 3,559 vinafanyiwa kazi na wakandarasi wapo kazini.

Alibainisha kwamba, kulikuwa na mradi wa ujazilizi ambapo vijiji 105 vimepata umeme na wananchi zaidi ya 25,000 kwenye mikoa nane ukiwemo Pwani wameunganishiwa umeme na mradi unaendelea.

Hata hivyo alisema, serikali hiyo imeweza kufanikisha miradi ya maji katika miji ya Bagamoyo, Kibiti ,Utete pamoja na mradi wa maji WAMI -Chalinze ,Ruvu -Chalinze -Msoga, mradi wa maji katika miji ya Kisarawe na Mkuranga. 

Subira alitaja ujenzi wa barabara kwa makao makuu ya wilaya ya Kibaha, Kisarawe, Mkuranga na Bagamoyo na upatikanaji wa dawa za kutosha kwenye vituo vya afya, zahanati na hospital za wilaya. 

Nae mwenyekiti wa UWT Pwani, Farida Mgomi aliishukuru serikali kwa utoaji elimu bure kwa shule za msingi na sekondari .

Ukarabati wa miundombinu ya elimu kwa shule kongwe za sekondari Kibiti, Kibaha, Ruvu, Minaki ,Kikaro, Mtanga Delta, Nyamisati na shule za msingi maeneo mbalimbali mkoani hapo. 

Mgomi alitaja mafanikio mengine ,kuwa ni ununuzi wa boti kwa ajili ya visiwa vya wilaya za Rufiji ,Kibiti na Mafia milioni 600.

“Ujenzi wa gati la Nyamisati -Mafia bilioni14 ,miradi ya REA III kwa vijiji 150.

Wajumbe hao kwa umoja wao walipongeza mafanikio yaliyopatikana kwenye sekta mbalimbali kwa kipindi alichokuwepo madarakani Rais. Dk Magufuli. “alisema Farida. 

Wajumbe wote kwa umoja wao walipongeza jitihada zinazochukuliwa na serikali kutatua kero mbalimbali kwenye sekta ya afya, nishati, maji, elimu na huduma za kijamii . 

Walimtakia afya njema Rais,makamu wa Rais Samia Suluhu na waziri mkuu Kassim Majaliwa. 

Mkutano huo wa Umoja wa Wanawake wa CCM Tanzania (UWT) umefanyika katika kusherehekea na kumpongeza Rais wa Jamhuri ya Muungano wa Tanzania Dkt. John Magufuli kwa kutimiza miaka mitatu akiwa madarakani huku kukiwa na mafanikio katika jamii

  
Mwenyekiti wa UWT Pwani, Farida Mgomi akizungumza katika sherehe hiyo.

 Mwenyekiti wa UWT wilaya ya Bagamoyo, Rukia Masenga akizungumza katika shrehe hiyo.

 
Mbunge wa viti maalum Mkoa wa Pwani, Subira Hamisi Mgalu akizungumza katika sherehe hiyo.

 

Mwenyekiti wa UWT Pwani, Farida Mgomi akiwa katika picha ya pamoja na Mbunge wa viti maalu mkoa wa Pwani, Madiwani wa viti maalum Halmashauri ya Bagamoyo, Mwenyekiti wa UWT Wilaya ya Bagamoyo Rukia Masenga pamoja na viongozi waandamizi wa UWT Pwani.

Picha ya pamoja viongozi wa UWT Pwani na Mwenyekiti wa UWT Mkoa wa Pwani.