DC BAGAMOYO AGAWA SUKARI YA MAGENDO KWA SHULE, MAGEREZA NA VITUO VYA KULELEA WATOTO.

 Mkuu wa wilaya ya Bagamoyo, ambae pia ni Mwenyekiti wa Kamati ya Ulinzi na Usalama wilaya, Zainabu Kawawa, akipokea Sukari kutoka kwa Afisa Mfawidhi wa Kituo cha Forodha Bandari ya Bagamoyo, Raymond Mwanisawa.

 
Mkuu wa wilaya ya Bagamoyo, ambae pia ni Mwenyekiti wa Kamati ya Ulinzi na Usalama wilaya, Zainabu Kawawa, akizungumza mara baada ya kupokea sukari na kuikabidhi kwa wakuu wa shule za serikali.

.........................................

Serikali wilayani Bagamoyo imekamata sukari iliyoingizwa kwa njia ya magendo na kuigawa kwa shule za sekondari na msingi, Magereza na vituo vya kulelea watoto yatima na wale wa mazingira magumu.

Akizungumza wakati wa kupokea sukari na kuigawa kwa wakuu wa shule, Mkuu wa wilaya ya Bagamoyo, ambae pia ni Mwenyekiti wa Kamati ya Ulinzi na Usalama wilaya, Zainabu Kawawa alisema wilaya ya Bagamoyo imejipanga kikamilifu kukomesha mianya yote ya kukwepa ushuru na kwamba kila anaejaribu kutumia Bandari bubu sheria itamshughulikia.

Alisema kuwa, Serikali inahitaji kukusanya mapato kupitia vyanzo vyake ili kuendesha mambo mbalimbli ya kimaendeleo katika jamii kwahiyo anaekwepa kodi na ushuru huyo ni mpinga maendeleo na serikali itamshughulikia.

Aidha, aliwataka wakuu wa shule kuitumia sukari hiyo kwa wananfunzi kama ilivyokusudiwa na wala si vinginevyo na kuonya kuwa, atakaetumia sukari kinyume na makusudio atamshughulikia.

Kwa upande wao walimu waliopokea sukari hiyo wamesema sukari hiyo itawasaidia kwenye matumizi ya shule kwa wananfunzi.

Wameahidi kuitumia kama ilivyokusudiwa na kwamba tayari wamejipanga kuweke udhibiti wa matumizi ili kusiwe na matumizi holela.

Awali, akizungumza wakati wa kumkabidhi sukari hiyo Mkuu wa wilaya ya Bagamoyo, Afisa Mfawidhi wa Kituo cha Forodha Bandari ya Bagamoyo, Raymond Mwanisawa, amesema wamemkabidhi Mkuu wa wilaya sukari hiyo ili agawe kwenye taasisi zenye uhitaji zikiwemo shule vituo vya kulelea watoto.

Mwanisawa alisema Mamlaka ya Mapato nchini (TRA) kwa bidhaa kama hizo zilizokwepa ushuru, Kamishna wa forodha na kodi ya bidhaa nchini anatoa kibali cha kugawa bidhaa hizo ili zisije kuharibika pale zilipohifadhiwa.

Alisema sukari hiyo imekamatwa kufuatia doria iliyofanywa na maafisa wa forodha kwa kushirikiana na jeshi la polisi katika kuhakikisha bidhaa zote zinazoingizwa Bagamoyo zinalipiwa ushuru halali wa serikali.

Jumla mifuko 220 ya sukari ambayo kila mmoja ukiwa na kilo 50 amekabidhiwa Mkuu wa wilaya ya Bagamoyo ili kuzigawa kwa taasisi zenye uhitaji.

Sukari ikishushwa kwenye Gari na kukabidhiwa wakuu wa shule kwaajili ya shule zao.

  
Mkuu wa wilaya ya Bagamoyo, ambae pia ni Mwenyekiti wa Kamati ya Ulinzi na Usalama wilaya, Zainabu Kawawa, akikabidhi sukari kwa shule ya Sekondari Bagamoyo.

 
Picha ya juu na chini ni Mkuu wa wilaya ya Bagamoyo, ambae pia ni Mwenyekiti wa Kamati ya Ulinzi na Usalama wilaya, Zainabu Kawawa, akiwa katika picha ya pamoja na watoto wa mazingira magumu wanalelewa katika kituo cha MOYO MMOJA, Bagamoyo mjini.