WAENDESHA BODABODA BUKOBA WAHOFIA USALAMA WAO.

Na Alodia Dominick, Bukoba.

Waendesha pikipiki katika manispaa ya Bukoba mkoani Kagera wameanza kuishi kwa wasiwasi baada ya kuzuka watu wanaojifanya ni abiria kumbe wana nia ya kuwajeruhi na kuwanyang'aya pikipiki zao nyakati za usiku.

Mmoja wa majeruhi hao ambaye amelazwa katika hospitali ya rufaa ya mkoa wa Kagera Bukoba Celvin Felix amesema, ilikuwa majira ya saa mbili usiku mwanzoni mwa wiki hii akiwa amempeleka mteja wake katika eneo la Kagemu kata ya Kitendaguro katika manispaa ya Bukoba mteja huyo alipomfikisha eneo alipokuwa anashukia alimgeuka na kumkata na kitu chenye ncha kali kiganja cha mkono wa kushoto na sehemu mbalimbali za mwili kisha kuondoka na pikipiki yake.

“Nilimbeba mteja majira ya usiku akaniambia anaenda eneo la Kagemu lakini sikuwa na wasiwasi kuwa anaweza kuwa mwizi tulipofika alipokuwa anashukia bahati mbaya kalikuwa kama ka poli nyumba ilikuwa mbele kidogo kusimama tu nilishutukia ananikata panga la mkono kabla sijajiweka sawa alinikata sehemu nyingine za mwili ndipo nilianguka na kuachia pikipiki na huyo mwizi kuondoka na piki piki yangu”.

Alisema Felix Felix ameendelea kusimulia kuwa, baada ya kupiga kelele za kuomba msaada ndipo wasamaria wema walifika na kumkimbiza hospital ambapo anaendelea kupata matibabu.

Kamishna msaidizi wa jeshi la polisi mkoani Kagera Revocatus Malimi amethibitisha kuwepo kwa matukio hayo na kusema kuwa, pikipiki zipatazo 14 zimeripotiwa kuibwa mkoani Kagera kati ya septemba 11 mwaka huu hadi octoba 20 mwaka huu.

Malimi amesema kutokana na taharuki hiyo jeshi la polisi lilijipanga na kuanza msako na kubaini kuwa kuna kikundi cha wahalifu ambacho kimeanzishwa na mtu mmoja ambaye alitoka mahabusu hivi karibuni na katika msako huo watuhumiwa wawili ambao ni Amdani Mswadiko (27) mkazi wa kata ya Katoro halmashauri ya Bukoba na Godwin Julius (31) mkazi wa manispaa ya Bukoba wamekamatwa pamoja na pikipiki nne zimekamatwa katika msako huo.

Kamanda Malimi amezitaja pikipiki zilizokamatwa katika msako huo kuwa ni pamoja na Bajaji Boxer mc 937 BRL, ya pili ji Bajaji Boxer mc 845 ASL, ya tatu ni Babjiji Boxer mc 632 BSU na ya nne ni Bajaji Boxer mc 570 BFA.

Hata hivyo amesema katika msako huo pia waliwakamata watu saba ambao wanadhaniwa kuwa wezi wa n’gombe ambapo n’gombe walioripotiwa kuibwa walikuwa ishirini na waliokamatwa katika msako ni saba.