Waziri Mkuu awaita Wananchi kushiriki mapambano dhdi ya ukatili wa Mwanamke na mtoto...

Imeelezwa kuwa Watoto wa kike ndio waathirika wakubwa wa ukatili wa ukeketaji na mimba za utotoni na ndoa kwa mujibu wa utafiti(TDHS)2015/16 ambao umeonesha kuwa asilimia 36 ya wanawake waliolewa kabla ya kufikia umri wa miaka 15,  hivyo Kuna umuhimu wa wadau kuungana na kupata nguvu ya pamoja ili kukomesha ukatili wa Mwanamke na mtoto.

Hayo yamebainishwa na WAZIRI Mkuu wa Jamuhuri ya Muungano wa Tanzania Mh. Kassim Majaliwa wakati wa ufunguzi wa Kongamano la kitaifa la kutokomeza ukatili dhidi ya wanawake na watoto jijini Dar es Salaam

 Majaliwa amesema Ili kukabiliana na ukatili huo, sasa ni wakati wa Serekali, Asasi za kiraia ,Mashirika, Halmashauri pamoja na wadau mbalimbali wa maendeleo kuzitilia mkazo na kuzifanyia kazi tafiti mbalimbali zinazofanywa wadau kwa lengo la kuongeza nguvu katika vita vya kupinga ukatili dhidi ya wanawake na watoto.

Aidha amesema kwa upande wa Serikali tayari imeshatoa mwongozo na utaratibu wa kuunda kamati za kushughulikia matukio hayo,lakini pia ameziagiza Halmashauri na mikoa zipange bajeti za kuimarisha kampeni za kutokomeza ukatili dhidi ya wanawake na watoto.

Alisema mwongozo huo utatoa utaratibu wa usimamizi na ufuatiliaji  kuhusu uundwaji wa kamati mbalimbali za mfumo wa mawasiliano na uwasilishaji wa taarifa jambo litakalosaidia kuwezesha kampeni ya utoaji wa elimu kwa jamii dhidi ya ukatili wa wanawake na watoto. 

 

Mhe Majaliwa ameongeza kuwa kutakuwa na kamati za kijinsia na ustawi wa wanawake na serikali Inaunga mkono na kutambua jitihada zinazofanywa na wadau mbalimbali  kutokomeza ukatili dhidi ya wanawake na watoto, pamoja na ndoa za utotoni ikiongozwa na Shirika la Jukwaa la Utu wa mtoto (CDF).


Kwa upande wake, Mkurugenzi Mtendaji wa Shirika la jukwaa la utu wa mtoto (CDF)Bw. Koshuma Mtengeti ameiomba serikali kutoa ushirikiano pamoja na kutenga bajeti ya kutosha katika kuendesha mikakati ya kupinga ukatili wa kinjisia nchini.

“Mwezi Mei mwaka 2018, mwalimu wa shule ya msingi hapa jijini Dar es Salaam alituhumiwa kuwadhalilisha kingono wanafunzi wake wanne wa kike wa darasa la saba kwa kuwageuza kuwa wake zake na kufanya nao ngono,”amesema Mtengeti.

Tunakushukuru sana Mh. Raisi John P. Magufuli kwa salamu zako kutoka kwa Waziri Mkuu, Mh. Kassim Majaliwa. Tumefarijika kujua kwamba uko nasi bega kwa bega katika kongamano hili la kupinga ukatili dhidi ya wanawake na watoto.

Makamu Mkuu wa Chuo Kikuu cha Dar es Salaam Prof. William Anangisye amesema Suala la Ukatili dhidi ya Watoto na Wanawake ni nyanja pana, ni tatizo linalozikabili nchi zote Duniani ingawa viwango vya Ukataili hutofautiana.

Ripoti mbalimbali za haki za binadamu zimeweza kuonyesha kuna ongezeko kubwa la ukatili dhidi ya watoto kwa kipindi cha mwaka 2018 ukilinganishwa na mwaka 2017 nchini.

Aidha, kongamano hilo litatoa fursa kwa washiriki kudadavua ukubwa wa sura za ukatili yanayowasibu wanawake na watoto na litasaidia juhudi za kuweka mikakati madhubuti ya kuzuia, kukabili na kuanzisha utaratibu wa kuboresha huduma kwa watoto na wanawake waathirika wa ukatili.