SERIKALI KUIMARISHA ULINZI MAENEO YA UTALII.

Naibu Waziri wa Mambo ya Ndani ya Nchi, Mhandisi Hamad Masauni, akizungumza  na wadau wa sekta ya Utalii ambapo aliwahikikishia nia ya serikali kuimarisha ulinzi maeneo yanayotumika kwa shughuli za utalii lengo ikiwa ni kuongeza mapato  kwa nchi na kutumia fursa zinazopatikana katika sekta hiyo. 

Kikao hicho kimefanyika Katika Ukumbi wa Sheikh Idrissa Abdul Wakil, visiwani Zanzibar. Picha na Wizara ya Mambo ya Ndani ya Nchi.

............................................

Serikali imedhamiria kuimarisha ulinzi katika maeneo mbalimbali ya utalii kwa kuweka vituo vya polisi vinavyohamishika ikiwa ni mpango wa kuwawekea mazingira salama wadau wa sekta hiyo na kuongeza mapato kwa nchi.

Kauli hiyo imetolewa na Naibu Waziri wa Mambo ya Ndani ya nchi, Mhandisi Hamad Masauni, wakati akizungumza na Wadau wa Sekta ya Utalii katika Ukumbi wa Sheikh Idrisa AbdulWakil, visiwani Zanzibar.

Alisema Serikali inatambua mchango wa sekta ya utalii na inajiandaa kuweka mipango madhubuti kuhakikisha ulinzi na usalama unakuwepo katika maeneo yote ya utalii.

“Tunatambua fursa na maendeleo yanayoletwa na utalii na jinsi pato la nchi litakavyoweza kuongezeka kwa kuimarisha sekta hiyo, hivyo serikali inakusudia kuweka vituo vya polisi katika maeneo ya utalii huku polisi wakishirikiana na polisi jamii waweze kuimarisha ulinzi kwa wageni wetu hawa,” alisema.

Akizungumza kwa niaba ya wadau wa utalii Visiwani Zanzibar, Abdallah Mwinyi aliiomba serikali kuwafundisha askari polisi elimu ya kumuhudumia mteja ili waweze kuwahudumia watalii hao pindi wakiwa nchini kwa shughuli za utalii.

“Tunaomba askari wetu wafundishwe elimu ya kuwahudumia watalii ikiwepo ukaguzi wa magari na watalii pindi wakiwa katika shughuli zao za kitalii lakini nawapongeza katika kupunguza matendo ya kihalifu katika maeneo kadhaa wanakopita watalii,” alisema.

Mdau wa Sekta  ya Utalii, Abdallah  Mwinyi akizungumza wakati  wa Kikao cha wadau wa sekta  hiyo, kilichoitishwa na Naibu Waziri  wa Mambo ya Ndani ya Nchi, Mhandisi Hamad  Masauni, lengo ikiwa ni kusikiliza changamoto wanazokutana nazo katika shughuli zao za utalii. Kikao hicho kimefanyika Katika Ukumbi wa  Sheikh Idrissa Abdul Wakil, visiwani Zanzibar. Picha na Wizara ya Mambo ya Ndani ya Nchi.

Kaimu Kamishna wa Jeshi la Polisi Zanzibar, Kamishna Msaidizi Mwandamizi wa Polisi, (SACP) Saleh Mohamed Saleh, akijibu maswali  ya wadau wa utalii yaliyoelekezwa katika idara yake kuhusu utaratibu wa polisi  wa usalama barabarani katika kukagua magari yanayobeba watalii. Kikao hicho kimefanyika  katika Ukumbi wa Sheikh Idrissa Abdul Wakil, visiwani Zanzibar. Picha na Wizara ya Mambo ya Ndani ya Nchi

Naibu  Kamishna  wa Uhamiaji, (D.C.I.) Ali Nassor , akijibu  maswali ya wadau wa utalii  yaliyoelekezwa katika idara  yake kuhusu utaratibu wa kuingia  nchini kwa watalii. Kikao hicho kimefanyika  katika Ukumbi wa Sheikh Idrissa Abdul Wakil, visiwani  Zanzibar. Picha na Wizara ya Mambo ya Ndani ya Nchi