SAMIA AWAASA WATANZANIA NA WAWEKEZAJI KUNUNUA MALIGHAFI NA BIDHAA ZINAZOZALISHWA NCHINI

Makamu wa Rais wa Jamhuri ya Muungano wa Tanzania Mhe. Samia Suluhu Hassan akipata maelezo kutoka kwa Mkurugenzi Mkuu wa Shirika la Reli Tanzania (TRL) Masanja Kadogosamara baada ya kutembelea banda la kampuni inayotengeneza reli mpya ya kisasa ya YAPI MERKEZ wakati wa ufunguzi wa maonyesho ya wiki ya Viwanda mkoani Pwani. (Picha na Ofisi ya Makamu wa Rais)

..............................................

NA MWAMVUA MWINYI, KIBAHA.

MAKAMU wa rais wa jamhuri ya muungano wa Tanzania ,Samia Suluhu amewaasa watanzania kujenga utamaduni wa kununua bidhaa zinazozalishwa kwenye viwanda vya ndani pamoja na wawekezaji  kununua malighafi za viwanda vilivyopo nchini .

Aidha ametoa rai kwa wadau na taasisi zote zinazosimamia miundombinu wezeshi ,uzalishaji na huduma ,kuweka mkakati madhubuti ambayo inaweza kuweka mazingira wezeshi kwa ustawi wa viwanda .

Samia aliyasema hayo wakati akifungua maonyesho ya bidhaa zinazozalishwa na viwanda vya mkoa wa Pwani ambayo yatafungwa Novemba 4 mwaka huu .

Pamoja na hayo ,ameuelekeza mkoa wa Pwani kutumia wawekezaji kuboresha chuo cha ufundi cha Kongowe ili wanafunzi wanaoshindwa kuendelea na masomo ya kidato cha tano waweze kwenda kupata ujuzi na baadae wapate ajira kirahisi viwandani .

Samia alisema ,watanzania na wawekezaji wa ndani wamekuwa hawana kasumba ya kununua vya kwao ambapo wamekuwa wakikimbilia bidhaa zinazotoka nje ya nchi .

Alieleza ,taswira ya uchumi wa viwanda wa viwanda inahusisha mnyororo mzima kuanzia uzalishaji ,utunzaji na usafirishaji wa malighafi kutoka kwenye maeneo ya uzalishaji hadi viwandani ,uchakataji  usindikaji ,ufungishaji wa bidhaa na usafirishaji wake kutoka viwandani hadi kwa walaji.

Samia alisema ,ili mnyororo huo ufanikiwe inahitaji miundombinu wezeshi na saidizi kama vile umeme,maji ,barabara na mawasiliano pia raslimali ,mifumo ya kitaasisi ,sheria na huduma za kifedha.

“Katika kulijua hili serikali kupitia taasisi mbalimbali ikiwemo TRL,Dawasa na Tanesco sasa zinajielekeza nguvu katika mkoa wa Pwani kuhakikisha umeme,maji ,miundombinu inakuwa ya uhakika ,ili mnyororo wa uchumi wa viwanda uwe vizuri zaidi”alisema Samia.

Kuhusu vijana aliwahimiza kusoma ili kupata ujuzi kwa lengo la kuajiriwa kuliko kutegemea kazi za vibarua.

Alizitaka sekta zinazoshughulikia maslahi ya wafanyakazi wazunguke kuona jinsi wafanyakazi wanavyohudumiwa.

” Wafanyajazi wengine wana wanafanyakazi za uzalishaji bila kupumzika huko viwandani ,masaa ya kazi yanajulikana ,hivyo haki na maslahi yao yapatikane “alifafanua Samia.

Nae waziri wa viwanda, biashara na uwekezaji ,Charles Mwijage alisema Tanzania inajenga uchumi wa Kitaifa ,ifikapo 2020-2025 wastani wa kipato cha mtanzania iwe milioni 7.5 kwa mwaka.

Aliupongeza mkoa wa Pwani kwa kutoa ajira  za moja kwa moja 20,000 kwa kipindi cha miaka mitatu.

“Ukitaka soka nenda Brazil ,ukitaka viwanda nenda Pwani “alisema Mwijage.

Mwijage alisema kuwa, Tanzania inatumia saruji tani milioni 4.8 kwa mwaka alimhakikishia Samia kwasasa wanauwezo wa kutengeneza saruji milioni 10.8 ,wanauwezo mkubwa kuzidi mahitaji.

Awali mkuu wa mkoa huo ,mhandisi Evarist Ndikilo alisema makamu wa Rais alikuwa mkoani hapo kwa siku tano ziara ambayo imeleta tija kwa wana Pwani.

Alisema maonyesho hayo yataweza kufungua soko zaidi kwa viwanda kwa kujitangaza.

Ndikilo alisema mkoa una jumla ya viwanda 429 ambapo vikubwa na vya kati 109, vidogo 320 na vya kusindika vipo 86.

Alitaja changamoto inayozikabili baadhi ya viwanda kukosa soko la uhakika hali inayosababisha kusuasua kwa uzalishaji.