MTENDAJI MKUU TFS AWATAKA WATUMISHI KUZINGATIA MAADILI.

Mtendaji Mkuu wa wakala wa Huduma za Misitu Tanznaia Prof. Dos Sanatos Silayo amewataka waajiriwa wapya na wazamani wa TFS watekeleze majukumu yao kadri sheria za nchi na jinsi maadili yanavyowataka.

“ Niwapongeze watumishi wapya kwa kupata nafasi ya kufanya kazi nasi lakini nataka kuwasisitizia kuwa suala la uadilifu na maadili katika utumishi si la mzaha, enendeni mkalitumikie taifa na kamwe msisubiri kufanya kazi kwa kusukumwa!

“Kila mmoja anatakiwa kufanya kazi kwa hiari, kwa kufuata sheria, kanuni, taratibu na miongozo iliyopo ili kuhakikisha utumishi wa umma unaleta tija iliyokusudiwa, nanyi watumishi wa zamani tumewaleta katika mafunzo haya ikiwa ni jitiada za kurejesha uadilifu na maadili miongoni mwenu, ” alisema Prof. Silayo.

Kwa upande wake Mkuu wa Mafunzo ya muda mfupi wa Chuo cha Utumishi wa Umma Tanzania, Charles Magaya aliyemwakilisha Kaimu Mtendaji Mkuu wa chuo hicho, Dr. Emanuel Shindika aliipongeza TFS kwa kutambua kuwa ili utumishi wa Umma uwe wenye ufanisi na wa kuheshimika, watumishi wanapaswa kuzifuata Kanuni za Maadili ya Utumishi pamoja na kuwa na tabia na mwenendo unaozingatia utoaji wa huduma bora, utiii kwa Serikali, kutoa huduma bila upendeleo, kufanya kazi kwa uadilifu, kuwajibika kwa umma, kuheshimu sheria na matumizi sahihi ya taarifa kwa kuwapa nafasi yakuwafunza watumishi hao.