WANAFUNZI LINDI WATUMIA CHUMBA CHA MAABARA KAMA DARASA LA KAWAIDA.

NA HADIJA HASSAN, LINDI.

Zaidi ya wanafunzi 50 wa kidato cha kwanza (C) wanaosoma katika shule ya sekondari mingoyo Halmashauri ya Manispaa ya Lindi Mkoani Lindi wanalazimika kutumia maabara ya Phizikia kama Darasa kufuatia changamoto ya madarasa iliyopo shuleni hapo.

 Wakizungumza na BAGAMOYO KWANZA BLOG baadhi ya wanafunzi hao akiwemo Marijani Hamisi mwajuma Adam na khalphan Jomary walisema kuwa changamoto wanayokutana nayo wakiwa wanatumia madarasa hayo kuwa wanalazimika kuhama hama mara kadhaa katika darasa lao pindi darasa hilo likitakiwa kutumiwa na wanafunzi wengine kwa ajili ya kujifunza kwa vitendo.

 “tunatumia darasa hili kutokana na changamoto ya madarasa iliyopo shuleni kwetu lakini hata hivyo mara nyingine kama wanafunzi wa darasa lingine wanataka kufanya practical sisi tunalazimika kuhama na kuhamia darasa lingine hivyo inatuletea usumbufu na wakati mwingine tunapoteza muda wa kujisomea kwa kutuhamisha hamisha” alisema Malijani Hamisi ambae ni miongoni mwa  wanafunzi hao 

Nae khalphani jomary alisema changamoto nyingine wanayokumbana nayo wakiwa wanatumia Darasa hilo kuwa hawako huru kulingana na mazingira yaliyokuwepo katika darasa hilo akitolea mfano wa Viti na meza zinazotumika hazikupaswa kutumika kwa muda mrefu. 

“hivi viti tunavyotumia ni virefu zaidi , kwa namna vilivyotengenezwa havikupaswa kutumika kwa zaidi ya vipindi viwili mfululizo maana wakati mwingine vinatufanya tuhisi ganzi lakini hata hivyo kuendelea kutumia darasa hili kwa siku nyingi bado sio salama kwa afya zetu kwa kuwa bado kuna baadhi ya kemikali zinaendelea kuhifadhiwa katika chumba hiki" Alisema.

 "Hebu fikiria kama kukitokea mlipuko wa namna yoyote ile itakuwaje katika usalama wetu” alihoji mwanafunzi huyo.

 Kufuatia changamoto ya Madarasa iliyopo katika Shule hiyo Serikali imetoa kiasi cha Tsh. Milioni 37.5 kwa ajili ya kumalizia ujenzi wa vyumba vitatu vya Madarasa katika Shule hiyo Hali iliyomfanya mkuu wa mkoa wa Lindi Godfrey Zambi kutembelea Shuleni hapo na kuona Maendeleo ya ujenzi wa madarasa hayo na kuonyesha kurizishwa na ujenzi huo.

 Hata hivyo Zambi aliutaka uongozi wa Shule hiyo kuongeza kasi ya ujenzi wa madarasa hayo ili yaweze kutumika kwa wakati. 

Awali akitoa taarifa ya Shule hiyo Mkuu wa Shule ya Sekondari Mingoyo Mwichande Lihoma alisema kuwa Shule hiyo kwa sasa inakabiliwa na changamoto ya upungufu wa  vyumba 7 vya madarasa huku akisema kuwa ujenzi wa Madarasa hayo matatu utasaidia kupunguza changamoto hiyo nasasa kufanya upungufu wa vyumba vinne 4 vya madarasa. 

Alisema kwa sasa ujenzi wa vyumba hivyo vya madarasa umefikia asilimia 80 na tayari kati ya Tsh. Milioni 37.5 zilizotolewa na Serikali tayari SH. Milioni 26.4 zimeshatumika katika ujenzi wa madarasa hayo

Muonekano wa jengo la vyumba vya vitatu vya madarasa vinvyoendelea kujengwa katika shule ya shule ya sekondari mingoyo Halmashauri ya Manispaa ya Lindi Mkoani Lindi. 

Picha na Hadija Hassan.