AJERUHIWA NA SIMBA NA KULAZWA HOSPITALI.

NA HADIJA HASSAN, LINDI.

KIZITO Mathey Mgogo (59) Mkazi wa Kata ya Rutamba, Halmashauri ya Wilaya ya Lindi Mkoani Lindi amelazwa katika Hospitali ya Mkoa huo, Sokoine, akiugulia majeraha aliyoyapata baada ya kushambuliwa na Simba nyakati za usiku.

Hayo yameelezwa na mdogo wake Michael Mathei alipokuwa akizungumza na BAGAMOYO KWANZA BLOG Jana Mei 05, 2019, ilipotembelea Hospitalini hapo.

Michael akizungumzia mkasa huo, alisema kaka yake anayekabiliwa na tatizo la akili, alipatwa na mkasa huo Aprili 26/2019, kati ya Saa 5:00 na 6:00 usiku akiwa amejilaza kwenye Kibanda kinachotumiwa na wajasiliamali wadogo wa kuuza Chakula.

Alisema siku hiyo Kizito akiwa anarejea Nyumbani kutoka katika mihangaiko yake, alipofika eneo la Namatili ndipo alikuta Kibanda hicho, kilichokuwa kimejengwa kwa kuzungushia Fito maeneo ya Pembeni bila ya kukandikwa kwa udogo, aliamua kuingia na kujilaza.

Michael aliendelea kuseama kuwa,  kaka yake akiwa kwenye usingizi  Simba wawili waliokuwa kwenye mawindo yao, waalikuwa wakikimbiza Mbwa waliokuwa maeneo ya Simba hao bila mafanikio, na walifika Kibandani hapo wakasimama na kuangalia kilicho ndani.

Alisema baada ya Simba hao kubaini ndani ya Kibanda kile kuna kitu na kukosa eneo la kupita, ndipo mmoja wa wao aliamua kupitisha mkono wake kupitia matundu ya Fito, ambapo kucha za Simba huyo zilifikia kati ya tumbo na Kifua cha Kaka yake, ambae alishtuka na kupiga kelele kuashiria kuomba msaada kutoka kwa majirani.

Michael alisema kutokana na kelele hizo Simba wale waliamua kuondoka huku wakimuacha Kizito akiendelea kuvuja Damu zilizotokana na kubanwa kucha za mnyama huyo.

Alisema wasamalia walipofika eneo la Kibanda hicho walimkuta tayari ameshajeruhiwa ambapo walimchukuwa hadi Kituo kidogo cha Polisi Kata ya Rutamba na kupatiwa Fomu namba tatu (PF3) na kumkimbiza Kituo cha Afya cha Rondo.

Hata hivyo kutokana na ukubwa wa tatizo hilo, Mganga wa Kituo hicho aliamuru apelekwe Hospitali ya Sokoine kwaajili ya matibabu.

Mmoja wa watumishi wa Hospitali hiyo, Dkt. Ernest Muhando, amesema wamempokea Majeruhi Kizito akiwa na majeraha kati ya kifua na tumboni, yaliyosababishwa na kushambuliwa na kucha za Simba.

Alisema mara baada ya kufikishwa Hospitalini hapo waliweza kumuanzishia Matibabu kwa haraka na kwamba sasa hali yake inaendelea vizuri.

BAGAMOYO KWANZA BLOG ilimtafuta Afisa Mali asili wa Wilaya ya Lindi, Victor Shau, ili kuzungumzia tukio hilo ambae amewaomba wananchi wanaoishi maeneo yanayokaribiana na Msitu wa Tarafa ya Rondo, kuchukuwa tahadhari ikiwa ni pamoja na kutotembea hovyo nyakati za usiku, kutoka Kijiji kimoja kwenda kingine ili kulinda usalama wa maisha yao.