DARAJA LA RUVU KWA DOSA LAANZA KUJENGWA

Mbunge wa jimbo la Kibaha Vijijini Mkoa wa Pwani Humoud Jumaa akiwa na baadhi ya kamati ya ujenzi Daraja na mafundi katika Kitongoji cha Ruvu kwa dosa, PICHA NA OMARI MNGINDO.

............................... 

Na Omary Mngindo, Ruvu

WAKULIMA zaidi ya 30,000 wanaolima ukanda wa Mto Ruvu jirani na Kitongoji cha Ruvu Kwadosa, Kata ya Mtambani Mlandizi Kibaha Vijijini Mkoa wa Pwani, wanataraji kunufaika na daraja linalojengwa, katika Kitongoji hicho.

Daraja hilo linalounganisha mashamba ukanda wa Mto Ruvu na Kitongoji hicho, wakazi kutoka mikoa ya Pwani, Dar es Salaan na Morogoro wanataraji kunufaika na daraja hilo, ujenzi ulioanza mwishoni mwa wiki iliyopita.

Mbunge wa Jimbo hilo Humoud Jumaa, alifika eneo la ujenzi, na kukutana na viongozi wa Kamati inayosimamia kazi hiyo, chini ya Mwenyekiti wa Kitongoji Mohamed Matimbwa na viongozi mbalimbali akiwemo Mjumbe Beatrice Lugongo.

Akizungumza katika eneo la ujenzi, Jumaa alisema kuwa kukamilika kwake kunataraji kugharimu shilingi milioni 30, hivyo kuondoa malalamiko ya miaka mongi, wakiwa na adha ya kupita kutokana na eneo kuwa na mkondo mkubwa wa kupitisha maji.

"Ujenzi wa daraja hili, unaotaraji kutumia zaidi ya shilingi milioni 30, utasaidia kuondoa adha kwa wakulima wanaojihusisha na shughuli hiyo ambayo ndio tegemeo kwa wananchi, si hapa nchini bali duniani kote," alisema Jumaa.

Matimbwa alisema kwamba kukamilika kwa ujenzi wa daraja hili utakuwa mkombozi, kwani kwa miaka mingi wakulima wa ukanda huo wanataabika hususani kipindi cha mvua.

Mjumbe Beatrice aliwaomba wananchi wajitolee katika kuchangia ujenzi huo, sanjali na kujitokeza kwenye eneo la mradi ili liweze kukamilika mapema iwezelanavyo.