BENKI KUU YAHAMISHA MALI NA MADENI YA BANK M KWENDA BENKI YA AZANIA

Naibu Gavana wa Benki Kuu ya Tanzania, Dkt. Bernard Kibesse akitangaza uamuzi wa Benki Kuu kuhamisha mali na madeni ya Bank M kwenda Azania Bank Limited leo wakati wa mkutano na waandishi wa habari uliofanyika Benki Kuu ya Tanzania jijini Dar es Salaam

..........................................

Benki Kuu ya Tanzania (BoT) imeamua kuhamisha mali na madeni ya Bank M kwenda Azania Bank Ltd.

Naibu Gavana wa Benki Kuu ya Tanzania, Dkt. Bernard Kibesse, amesema katika mkutano na waandishi wa habari BoT jijini Dar es Salaam tarehe 15 Januari 2019 kwamba kwa sasa, Benki Kuu, Azania Bank Ltd na wadau wengine wanaendelea kuandaa taratibu za kisheria za kukamilisha mchakato wa uhamishaji wa mali na madeni ya Bank M kwenda Azania Bank Ltd.

“Wateja wenye amana na wadau wengine wa Bank M watataarifiwa tarehe ya kuanza kupata huduma za kibenki kupitia Azania Bank Ltd,” alisema na kuongeza kuwa “wateja wenye mikopo wanatakiwa kuendelea kulipa mikopo yao kulingana na mikataba yao.”

Katika mkutano ambao pia ulihudhuriwa na Naibu Gavana (AIC), Bw. Julian Banzi Raphael, Dkt. Kibesse alisema, Benki Kuu iliamua kuhamisha mali na madeni ya Bank M kwenda benki nyingine kama njia ya kutatua matatizo ya benki hiyo ambayo imekuwa chini ya usimamizi wa Benki Kuu tangu mwezi Agosti mwaka 2018.

Katika Naibu Gavana Kibesse amewahakikishia wananchi kwamba Azania Bank Ltd “itakuwa na ukwasi wa kutosha kuweza kuwahudumia wateja wake na wateja wapya kutoka Bank M baada ya kuchukua mali na madeni ya benki hiyo.”

“Mtaji wa Azania Bank Limited unatarajiwa kufikia kiasi cha shilingi za Kitanzania bilioni 164 ambacho ni juu zaidi ya mtaji wa shilingi bilioni 15 unaotakiwa kisheria,” alisema.

Naibu Gavana ameuhakikisha umma kwamba Benki Kuu ya Tanzania itaendelea kulinda maslahi ya wateja wenye amana katika mabenki na kuimarisha uhimilivu katika sekta ya fedha nchini.

Benki Kuu ya Tanzania ilichukua usimamizi wa Bank M Ltd mnamo tarehe 2 Agosti 2018 baada ya Benki Kuu, ambayo inajukumu la kusimamia na kudhibiti mabenki na taasisi za fedha, kubaini kuwa Bank M ilikuwa na upungufu mkubwa wa ukwasi na hivyo kushindwa kulipa madeni yake.

Baada ya kuiweka chini ya usimamizi wake, Benki Kuu ilisitisha shughuli za utoaji wa huduma za kibenki za Bank M kwa muda wa siku 90 ili kuipa nafasi Benki Kuu kutathmini hatua za kuchukua ili kupata ufumbuzi wa tatizo hilo.

Mnamo tarehe 2 Novemba 2018 Benki Kuu iliongeza muda wa usimamizi kwa siku 60 ili kupata muda wa kutosha wa kutathmini hali ya kifedha ya Bank M, ambayo ilikuwa ni hatua muhimu katika utatizo wa matatizo ya Benki hiyo. Hatua hizo ndio zimefikisha hatua ya leo.

Bank M ilipewa leseni na kuanza kufanya shughuli za kibenki hapa nchini mwaka 2008, na kuwa miongoni mwa benki zilizokua kwa haraka na kuwa na mali zenye thamani zaidi ya shilingi za Kitanzania trilioni moja. Bank M ilikuwa na jumla ya matawi matano, matatu yakiwa jijini Dar es Salaam na mengine mawili yakiwa katika majiji ya Arusha na Mwanza.