NAIBU WAZIRI JAFO AKERWA NA VITEN DO VYA USHIRIKINA WANAVYOFANYIWA WATUMISHI KATIKA MAENEO YAO YA KAZI

Naibu Waziri Ofisi ya Rais , Tawala za mikoa na serikali za mitaa (Tamisemi), Selemani Jafo, akipewa maelekezo juu ya matumizi ya mfumo wa kukusanyia mapato.

 

Naibu Waziri Ofisi ya Rais , Tawala za mikoa na serikali za mitaa (Tamisemi), Selemani Jafo, akiwa na mbunge wa Nzega Hussein Bashe katika ukaguzi wa bweni la wasichana wilaya ya Nzega.

.........................

KUTOKANA na baadhi ya wananchi kuwafanyia vitendo vya ushirikina watumishi katika Halmashauri mbalimbali nchini, Naibu Waziri Ofisi ya Rais , Tawala za mikoa na serikali za mitaa (Tamisemi), Selemani Jafo ameonyesha kukerwa na tabia hiyo inayowasababishia watumishi kupata msongo wa mawazo na wengine kuomba kuhamishwa vituo vyao vya kazi.

Jafo alitoa kauli hiyo alipokuwa akikagua zahanati mpya iliyopo kijiji cha Ziba katika Jimbo la Manonga wilayani Igunga mkoani Tabora na alipokuwa akizungumza na watumishi wa wilaya hiyo.

Alimuagiza mkuu wa wilaya ya Igunga kutenga muda yeye na kamati yake ya ulinzi na usalama kuwafikishia ujumbe wananchi wa wilaya ya Igunga kuwakemea wenzao wenye tabia hiyo wilayani humo ili kuacha tabia hiyo ovu.

 Naibu waziri Jafo alisisitiza kwamba tabia hiyo imewasababishia baadhi ya watumishi walio tendewa vitendo hivyo kupatwa na msongo wa mawazo na kuomba kuhama maeneo walio pangiwa.

Naibu Waziri alisema kwamba jamii inapaswa kuwathamini watumishi kwani wametoka maeneo mbalimbali ya nchi ili kuja kuwatumikia wao hivyo wanatakiwa kuwathamini na kuwaheshimu kwa kulinda utu wao.

” Watani zangu mliopo hapa Wasukuma na Wanyamwezi mmepata zahanati nzuri naomba muitunze. Pia sitaki kusikia daktari au mhudumu  amelala asubuhi anajikuta ng’ambo ya barabara au katika kiwanja cha mpira,”alisema Jafo.

Aidha, alikemea kitendo cha sungusungu walio mchapa viboko mwalimu mkoani humo huku akiwaagiza wakuu wa wilaya maeneo yote kupambana na tabia za udhalilishaji wanazo fanyiwa watumishi wa umma katika jamii ili waweze kufanya kazi kwa amani na kujiamini.

Aliwapongeza viongozi wa mkoa wa Tabora kwa umoja na ushirikiano wao katika kuwaletea maendeleo wananchi wa mkoa huo.