TRA YAGAWA MASHINE ZA EFD KWA MAKATIBU WAKUU WA WIZARA KWAAJILI YA KUKUSANYA KODI ZA SERIKALI.

 

Kamishna Mkuu wa Mamlaka ya Mapato Tanzania (TRA), Alphayo Kidata akionyesha Mashine ya mfano ya Kieletroniki ya EFDs kabla ya kugawa kwa mashine tano katika wizara zote za Serikali ya Jamhuri ya Muungano wa Tanzania jijini Dar es Salaam leo, ambazo zitakuwa kwaajili ya kukusanya mapato katika wizara hizo. 

MAMLAKA ya mapato Tanzania (TRA) imegawa Mashine za Kieletroniki za EFDs tano kwa kila katibu Mkuu wa Wizara kwa ajili ya kukusanya maduhuli ya serikali kwa kutumia mashine hizo.

 Hatua hiyo imetokana na agizo la  Rais wa Jamuhuri ya Muungano wa Tanzania Dkt. John Pombe Magufuli ya kutaka Wizara zinazotoa huduma ziwe na mashine za EFD ili kuweza kujiletea maendeleo na kukuza uchumi wa taifa.

 Akizungumza na waandishi wa habari  jijini Dar es Salaam leo, Kamishna Mkuu wa TRA, Alphayo Kidata amesema kuwa ugawaji wa mashine hizo kwa taasisi za serikali zitasaidia kutunza  kumbukumbu katika kupanga maduhuli.

“Mashine hizi ni lengo serikali katika kuhakikisha wananchi wanaopata huduma wanapata risiti kwa kutambua umuhimu wa kodi kwa huduma wanazopata”alisema Kidata.

Aidha alisema  kuwa, mashine hizo ni mashine za kwanza katika mashine zote kutokana na kuwa za kisasa katika kutunza kumbukumbu za huduma ambazo wanazitoa.

Kamishna wa Mapato ya Ndani wa TRA, Ellijah Mwandumbya alisema watawafundisha wakuu wa idara hizo jinsi ya kuzitumia ili kuwa na ufaisi katika utekelezaji wa agizo la Rais la ukusanyaji wa mapato.

 

 

Baadhi ya wawakilishi wa wizara mbalimbali za serikali wakiwa katika mkutano wa kukabidhiwa mashine za Kieletroniki za EFDs jijini Dar es Salaam leo.