UFAULU KIDATO CHA SITA WASHUKA KWA ASILIMIA 0.93 HUKU UBORA WA UFAULU UKIPANDA KWA ASILIMIA 3.72

 

Katibu Mtendaji wa Baraza la Mitihani la Tanzania (NECTA), Dkt. Charles Msonde, alipokuwa akizungumza na waandishi wa Habari kuhusu matokeo ya kidato cha sita 2016. 

Ufaulu wa kidato cha sita 2016 umeonekana kushuka kwa asilimia 0.93 baada ya ufaulu wa jumla kuwa asilimia 97.94 ukilinganisa na mwaka 2015 ambao ulikuwa asilimia 98.87.

Hayo yalibainishwa leo jijini Dar es Salaam, na Katibu mtendaji wa Baraza la Mitihani la Tanzania (NECTA) Dkt. Charles Msonde, alipokuwa akitangaza matokeo ya kidato cha sita 2016 mbele ya waandishi wa Habari.

Dkt. Msonde alisema Ufaulu wa jumla katika Mtihani wa Kidato cha Sita 2016 unaonesha kushuka kwa asilimia 0.93 ambapo mwaka 2015 ufaulu ulikuwa asilimia 98.87 na mwaka 2016 ufaulu ni asilimia 97.94.

Hata hivyo, ubora wa ufaulu umeonekana kuimarika kwa kuwa idadi ya watahiniwa waliofaulu vizuri katika daraja la I, II na III imeongezeka kwa asilimia 3.72 kutoka asilimia 89.41 mwaka 2015 na kuwa asilimia 93.13 mwaka 2016.

Alisema Jumla ya watahiniwa 74,896 waliandikishwa kufanya Mtihani wa Kidato cha Sita 2016 wakiwemo wasichana 27,717 (37.01%) na wavulana 47,179 (62.99%) ambapo kati ya watahiniwa waliosajiliwa, watahiniwa wa Shule walikuwa 65,585 na watahiniwa wakujitegemea walikuwa ni 9,311.

Aidha, alisema kuwa, kati ya watahiniwa 74,896 waliosajiliwa kufanya Mtihani wa Kidato cha Sita Mei 2016, watahiniwa 73,940 sawa na asilimia 98.72 walifanya mtihani na watahiniwa 956 sawa na asilimia 1.28 hawakufanya mtihani.

Aliongeza kuwa, Watahiniwa wa Shule waliofaulu ni 63,528 sawa na asilimia 97.94 ya waliofanya mtihani huku wasichana waliofaulu ni 24,062 sawa na asilimia 98.59 na wavulana ni 39,466 sawa na asilimia 97.55. 3 ambapo Mwaka 2015 Watahiniwa 34,777 sawa na asilimia 98.87 ya Watahiniwa wa Shule walifaulu mtihani huo.

Dkt. Msonde alisema takwimu za ufaulu kimasomo zinaonesha kushuka kwa ufaulu, katika masomo ya Sayansi kati ya asilimia 5.36 na 8.9; masomo ya Sanaa kati ya asilimia 0.00 na 4.43 na masomo ya Biashara kati ya asilimia 1.7 na 6.9.