DC BAGAMOYO AMUAGIZA MKURUGENZI WA CHALINZE KUFUATILIA KESI ZA WATU WALIOWAPA MIMBA WANAFUNZI.

Mkuu wa wilaya ya Bagamoyo, Alhaj, Majid Mwanga amemuagiza Mkurugenzi wa Halmashauri ya Chalinze kufuatilia wanafunzi wote waliopata mimba na kushindwa kuendelea na masomo ili kuwachukulia hatua za kisheria wazazi, pamoja na wanaume ambao wamewatia mimba.

Akizungumza katika mahafali ya 10 ya wanafunzi waislamu wanaosoma katika katika shule ya Sekondari Chalinze, Mkuu huyo wa wilaya alisema zipo badhi ya kesi zinaendelea mahakamani na kwamba lengo ni kuhakikisha kila aliyehusika kwa namna moja au nyingine kukatisha masomo ya mwanafunzi anachukuliwa hatua stahiki za kisheria ili iwe fundisho kwa wengine wenye tabia kama hizo.

Aidha, alisema katika wilaya ya Bagamoyo Tarafa ya Chalinze ndio inayoongoza kwa kwanafunzi kukatisha masomo kwasababu ya kupata mimba hivyo amemuagiza Afisa Tarafa wa Tarafa ya Chalinze kupata takwimu ya wanafunzi waliokatisha masomo yao katika Tarafa hiyo.

Akizungumzia maadili katika jamii mkuu huyo wa wilaya ya bagamoyo aliwataka mabinti wa kiislamu kuvaa mavazi ya stara katika maisha yao ya kila siku ili kuepuka vishawishi kwa wanaume hali itakayopelekea kukatisha masomo yao na kupata magonjwa ya zinaa ikiwemo UKIMWI.

Alisema jamii inapaswa kutambua kuwa UKIMWI bado upo na kwamba njia kubwa inayopelekea kupata maambukizi ya VVU ni kufanya zinaa hivyo aliwataka vijana kuepuka starehe ambazo zitakatisha ndoto zao na ndoto za wazazi wao.

Kwa upande wake Mjumbe wa Baraza la ulamaa BAKWATA wilaya ya Bagamoyo, sheikh Simba Aboubakari aliwataka vijana wanaomaliza elimu ya sekondari waonyeshe tofauti kati yao na wale ambao hawakufika ngazi hiyo ya elimu.

Alisema Elimu bora ni ile inayompelekea mtu kuwa na tabia njema, madili mema yanayotafsiriwa kwa vitendo katika jamii inayomzunguuka.