HATIMAE GODBLES LEMA NJE KWA DHAMANA YA MILIONI MOJA.

Mahakama Kuu Kanda ya Arusha, imemuachia huru Mbunge wa jimbo la Arusha Mjini, Godbles Lema (CHADEMA) kwa dhamana ya shilingi milioni moja pamoja na wadhamini wawili wenye vitambulisho vinavyotambulika na serikali.

Mbunge Lema alikaa mahabusu kwa takribani miezi minne akikabiliwa na kesi ya uchochezi, katika Gereza Kuu la Arusha lililopo Kisongo, na kwamba amefanikiwa kupata dhamani na kupokewa na washabiki wake waliomtandikia kanga ili apite wakati akitoka mahakamani hapo.

Hukumu hiyo ndogo imesomwa na jaji aliyekuwa akisikiliza kesi hiyo, Fatuma Magimbi  katika mahakama kuu Arusha.

Akizungumza nje ya mahakama hiyo, Lema alisema kuwa amejifunza mengi alipokuwa mahabusu kwa kipindi chote hicho na kwamba ameandaa waraka wa kumwandikia Raisi kuelezea yale aliyoyaona alipokuwa mahabusu.

Nae mwenyekiti wa Chadema Taifa, Freeman Mbowe alisema kuwa wanamkaribisha tena Lema bungeni na kwamba kamati ya chama imemaliza vikao vyake mjini hapa na kuwashukuru wabunge wa mikoa mbali mbali waliofika kutetea dhamana ya lema.