MBUNGE WA CHALINZE APOKEA MSAADA WA MADARASA YENYE THAMANI YA MILIONI 30 KUTOKA KWA WAPAKSTAN

 Mbunge wa jimbo la Chalinze Ridhiwan Kikwete ,akizungumza wakati wa uzinduzi wa madarasa sita na ofisi moja ya walimu katika shule ya msingi Pakistan utete kata ya Pera,yaliyokarabatiwa kwa ufadhili wa marafiki wa Pakistan.

 

 Balozi wa Pakistan nchini Tanzania,Amir Khan akizungumza baada ya kuzindua majengo ya madarasa sita na ofisi moja ya walimu yaliyokarabatiwa na marafiki wa Pakistan katika shule ya msingi Pakistan utete iliyopo kata ya Pera,kushoto kwake ni mbunge wa jimbo la Chalinze Ridhiwan Kikwete

 

 Mbunge wa jimbo la Chalinze, Mh. Ridhiwani Kikwete, amezindua Madarasa sita yenye yaliyokarabatiwa na marafiki wa Pakstani kwa gharama ya shilingi milioni 30

Madarasa hayo sita na ofisi moja ya walimu yamejengwa katika shule ya msingi Pakistan Utete iliyopo kata ya Pera, Halmashauri ya Chalinze wilayani Bagamoyo, mkoa wa Pwani. 

Akizungumza wakati wa uzinduzi wa madarasa hayo, Mbunge huyo wa Jimbo la Chalinze aliwataka wananchi waache tabia ya kusubiri kila kitu kufanywa na serikali na badala yake wawe mstari wa mbele kujitolea katika shughuli mbali mballi za maendeleo.

Aidha amesema ofisi yake na halmashauri wataendelea kuunga mkono juhudi za wafadhili na wadau mbalimbali wanaojitokeza kushirikiana nao kutatua changamoto zinazowakabili zilizopo katika jimbo hilo ikiwemo elimu.

Alisema baadhi ya wafadhili wanasaidia endapo wanaona jamii husika ikichukua juhudi juu ya jambo fulani na kufikia hatua mbalimbali .

 Aliwataka wananchi wa Chalinze kushirikiana na serikali, halmashauri na wafadhili wanaojitokeza ili kukamilisha miradi ya maendeleo iliyopo kwenye maeneo yao.

Aliongeza kwa kusema kuwa kipaumbele katika Halmashauri ya Chalinze ni kuondoa changamoto zote zilizopo katika sekta ya Elimu.

 Ridhiwani alisema wakati marafiki wa Pakistan wakiwezesha ukarabati huo,lakini halmashauri ya Chalinze imeshatenga fedha kwa ajili ya kujenga matundu ya vyoo nane katika shule ya Pakistan Utete.

 Aliongeza kwa kusema kuwa, wanajenga matundu ya vyoo katika shule ya msingi Mbala sanjali na madarasa mawili ya shule ya msingi Makombe.

 Ridhiwani alieleza,ujenzi wa matundu ya vyoo utasaidia kuondoa kero ya uchafu wa mazingira ambapo baadhi ya wanafunzi wamekuwa wakijisaidia ovyo maporini ,vichakani .

  Akizungumzia msaada walioupata kutoka kwa marafiki wa Pakistan, Mh. Ridhiwani aliwaomba marafiki hao kuendeleza ushirikiano baina yao na Halmashauri ya Chalinze ili kufanikisha mambo mbalimbali ya maendeleo.

 Alitumia nafasi hiyo kumpongeza mwenyekiti wa kitongoji Hussein Mramba na diwani wa kata ya Pera kwa jitihada walizozichukua kusukuma jambo hilo.

 Aidha,  alimuomba Balozi wa Pakistan nchini Tanzania, Amir Khan ,kuwasaidia ujenzi wa jengo la kulaza wagonjwa  na mashine za kupima magonjwa katika kituo cha afya Chalinze.

 

 Balozi wa Pakistan nchini Tanzania,Amir Khan akizungumza baada ya kuzindua majengo ya madarasa sita na ofisi moja ya walimu yaliyokarabatiwa na marafiki wa Pakistan katika shule ya msingi Pakistan utete iliyopo kata ya Pera,kushoto kwake ni mbunge wa jimbo la Chalinze Ridhiwan Kikwete.

 Kwa upande wake Balozi wa Pakistan hapa nchini, Amiri Khan, alisema amefurahishwa na ushirikiano uliopo baina ya nchi hiyo na Tanzania,na alishauri kuwepo na mahusiano kati  ya wabunge wa Pakistan na Tanzania.

 “Nilipoambiwa kuja shuleni hapa ni km 120 kutoka Dar es salaam nikaona nije kutembea na kuona kilichofanyika, Nawapongeza kwa kuanzisha ujenzi huu  ili watoto wapate elimu”alisema Khan.

 Alisema ili watoto hao wasome vizuri ni vyema kukajengwa uzio katika shule hiyo ili kuweka usalama zaidi na kwamba wanaweza kusaidia kuujenga.

 Balozi huyo,aliahidi na kukubali ombi la kusaidia mashine na vifaa vya kituo hicho cha afya lakini kwasasa wanachotakiwa kufanya ni kuandika maombi ya msaada huo.

 

 Balozi wa Pakistan nchini,Amir khan wa kushoto na mbunge wa jimbo la Chalinze Ridhiwan Kikwete,wakikagua majengo ya madarasa sita na ofisi moja ya walimu katika shule ya msingi Pakistan utete kata ya Pera,yaliyokarabatiwa kwa ufadhili wa marafiki wa Pakistan

 

 Balozi wa Pakistan nchini,Amir khan wa kushoto na mbunge wa jimbo la Chalinze Ridhiwan Kikwete,wakiingia katika lango kuu la  majengo ya madarasa sita na ofisi moja ya walimu katika shule ya msingi Pakistan utete kata ya Pera,yaliyokarabatiwa kwa ufadhili wa marafiki wa Pakistan

 

 Mbunge wa jimbo la Chalinze Ridhiwan Kikwete kushoto akiagana na balozi wa Pakistan nchini Amir Khan baada ya kuzindua majengo ya madarasa sita na ofisi moja ya walimu katika shule ya msingi Pakistan utete kata ya Pera,yaliyokarabatiwa kwa ufadhili wa marafiki wa Pakistan.