DHI NUREYN YAJENGA WODI YA WAZAZI BAGAMOYO.

 
Mkuu wa Mkoa wa Pwani, Mhandisi Evarist Ndikilo, kushoto akiangalia jengo la wodi ya wazazi linalojengwa na Taasisi ya Kiislamu ya DHI NUREYN ya Iringa, kulia ni Mhandisi wa majengo wa DHI NUREYN, Ally Upete.

......................

 

Taasisi ya kiislamu ya Dhi Nureyn yenye makao yake makuu mjini Iringa inajenga majengo mawaili katika Hospitali ya Bagamoyo, yenye thamani ya zaidi ya shilingi milioni mia 494.

Majengo hayo ni wodi ya wazazi itakayokuwa na uwezo wa kuwekwa vitanda 30 pamoja na jengo la wagonjwa wa dharula hali kupunguza msongamano katika katika wodi ya wazazi.

Mkuu wa Mkoa wa Pwani, Mhandisi Evarist Ndikilo ametembelea katika Hospitali ya wilaya ya Bagamoyo ili kujionea majengo hayo na kusema kuwa Taasisi hiyo imefanya kitu chenye thamani kubwa kwa serikali na kwamba Serikali inathamini Mchango huo.

Mkuu huyo wa Mkoa alisema anatoa shukrani za dhati kwa Taasisi ya Dhi nureyn kwa msaada huo ambao utasaidia kuondoa msongamano kwa wazazi wanaofika kujifungua hospitalini hapo.

Aliwataka watumishi katika Hospitali ya wilaya ya Bagamoyo pindi majengo hayo yatakapokamilika kutoa huduma bora zitakazolingana na ubora wa majengo hayo ili kuondoa malalamiko kwa wananchi wa Bagamoyo.

Aidha, aliwataka watumishi wote katika Hospitali hiyo kuyatumia vizuri majengo hayo na kuyatunza ili iwe kielelezo kwa vizazi na iwe hamasa kwa wafadhili waliojenga waweze kuvutiwa kutoa msaada mwingine zaidi. 

Alitumia fursa hiyo pia kumpongeza Mkuu wa Wilaya ya Bagamoyo, Alhajj, Majid Mwanga, kwa kuwatafuta wafadhili hao na kufanikisha ujenzi mkubwa ndani ya wilaya yake na kwamba itabaki kuwa alama ya milele atakayoiacha katika wilaya hiyo.

Akisoma Taarifa fupi mbele ya mkuu wa Mkoa, Mganga mkuu wa Wilaya ya Bagamoyo, Dkt. Silvia Mamkwe, alisema ujenzi huo ni msaada mkubwa kwa Hospitali ya wilaya Bagamoyo, ambapo kukamilika kwake kutaondoa adha ya msongamano kwenye wodi ya wazazi.

Alisema ujenzi huo unaoendelea hivi sasa ni jengo la wodi ya wazazi litakalogharimu shilingi milioni mia tatu kumi na sita laki nane kumi na tisa mia saba na kumi, 316,819,710. Na Jengo la wagonjwa wa dharula litagharimu milioni mia moja sabini na nane laki nne  themanini na tisa mia tisa sabini na saba 178,489,977 .

Aidha, alisema uongozi wa hospitali na ya Wilaya pamoja na watumishi wote wanaendelea kuwapa ushirikiano wafadhili hao (DHI NUREYN) ili waweze kufanikisha ujenzi huo kama walivyopanga.

Dkt. Mamkwe alisema kukamilika kwa ujenzi huo kutaisaidia kuongeza ufanisi katika utoaji wa matibabu haswa kwa wagonjwa wa dharula na wodi wazazi.

Alisema kuwa jengo la wodi ya wazazi litakapokamilika litakuwa na uwezo wa kulaza kina mama 30, ambapo kila mama atalala kwenye chumba chake, pamoja na chumba cha kujifungulia kina mama kitakachokuwa na vitanda vya kujifungulia vinane wakati kwa kwa sasa kuna vitanda vitatu tu vya kujifungulia.

Aliongeza kwa kusema kuwa, jengo la dharula lina umuhimu mkubwa kwa sasa katika mji wa Bagamoyo, hasa ikizingatiwa kuwa, kuna ongezeko la watu kutokana na ujenzi wa viwanda, na kukamilika kwa barabara ya Bagamoyo Msata hali inayopelekea kuwa na majeruhi wengi wanaotokana na ajali za Barabarani.

Alisema Jengo hilo la huduma za dharula litakuwa na vitanda sita na ofisi za watoa huduma ili kukabiliana na majanga ya ajali mbalimbali yanayotokea mara kwa mara.

Aidh, alisema Taasisi ya Dhi Nureyn imeahidi kuweka vifaa tiba katika yake hayo inayojenga na kukabidhi tayari kwaajili ya matumizi tu.

Akielezea historia ya Hospitali hiyo ya wilaya ya Bagamoyo, alisema Hospitali hiyo ilianzishwa na Mfanyabiashara Sewahaji mwaka 1895 ambapo mwaka 1961 ilimilikwa rasmi na Serikali na kwamba mpaka sasa Hospitali hiyo ina uwezo wa kulaza wagonjwa  100 kwa siku katika wodi sita zilizopo.

Mganga huyo wa Wilaya ya Bagamoyo, alisema pamoja na ujenzi huo unaodhaminiwa na Taasisi ya Dhi nureyn, bado Hospitali hiyo inakabiliwa na changamoto mbalimbali ikiwemo uchakavu wa majengo, mifumo mibovu ya maji taka na safi pamoja na miundombinu ya umeme.

Taasisi ya Dhi Nuryn imefanikisha uchimbaji kisima katika Hospitali ya Bagamoyo ili kuondoa tatizo la maji katika Hospitali lakini pia imeweza kuchimba visima katika makazi ya watu kwenye mitaa iliyokuwa na tatizo la maji na hivyo kufanya jumla ya idadi ya visima vilivyochimbwa na Taasisi ya Dhi Nureyn mjini Bagamoyo kufika kumi mpaka sasa.

 Mganga mkuu wa Wilaya ya Bagamoyo, Dkt. Silvia Mamkwe,kulia akisoma Taarifa fupi kuhusu majengo ya wodi ya wazazi na jengo la wagonjwa wa dharula, mbele ya mkuu wa mkoa wa Pwani, mbeleya yake kutoka kushoto ni mbunge wa Jimbo la Bagamoyo, Dkt. Shukuru Kawambwa, wa pili ni Mkuu wa Wilaya ya Bagamoyo, Alhaj, Majid mwanga, watatu ni mkuu wa mkoa wa pwani, Mhandishi Evaristi Ndikilo, wa nne ni Mwenyekiti wa CCM wilaya ya Bagamoyo, Almasi Masukuzi na watano ni Mkurugenzi wa Halmashauri ya Bagamoyo, Fatuma Omari Latu.

 Mkuu wa Mkoa wa Pwani, Mhandisi Evarist Ndikilo, kulia akipata maelezo kutoka kwa Mhandisi wa majengo wa Dhi Nureyn namna jengo jipya la wodi ya wazazi litakavyoungana na jengo la zamani.