WAKAANGA SAMAKI BAGAMOYO WALALAMIKIA KUHAMISHWA.

Baadhi ya wakaanga samaki katika soko la samaki mjini Bagamoyo wamelalamikia kuondolewa kwa kwenye maeneo yao na kusema eneo eneo walilohamishiwa halitoshi kwa shughuli zao.

Wakizungumza na Mwandishi wa habari hizi katika soko la samaki mjini Bagamoyo wakaangaji hao walisema wameshahamishwa mara mbili sasa na kwamba hawana tena pesa za kujengea sehemu nyingine.

Walisema awali walibomolewa vibanda vyao na kutakiwa kuhamia sehemu nyingine ambayo nayo wameambiwa waondoke.

wakionekana  kukerwa na kitendo hicho walisema sehemu ambayo kwa sasa wapo na kutakiwa kuondoka wapo jirani na eneo linalomilikiwa na mzungu hali inayowafanya wajione wanyonge wanaondolewa ili aachwe mzungu hali ya kuwa mabanda yao hayaingiliani na eneo la mzungu.

Diwani wa kata ya Dunda mjini bagamoyo Dcksoni Makamba alisema ni kweli wananchi hao wanaofanya shughuli zao za kukaanga samaki waliondolewa kwa sababu ya upanuzi wa ujenzi wa soko la kudumu la kukaangia samaki.

Aidha, Makamba alisema sehemu waliyopo kwa sasa ipo jirani na eneo linalomilikiwa na mzungu ambalo kiusalama ni hatari kuwepo hapo kutokana na shughuli zao za moto hali inayoweza kusababisha ajali ya moto kwenye majengo mengine.

Diwani huyo aliwataka wananchi hao kuwa na subira wakati uongozi wa halmashauri ukishughulikia umaliziaji wa soko la kudumu la kukaanga samaki ambalo kila mmoja atakuwa kwenye chumba chake na kutumia majiko ya gesi.