UTAFITI WA GST WAONGEZA KASI YA UKATAJI LESENI MTWARA

 

Serikali kupitia Taasisi ya Jilolojia na Utafiti wa Madini (GST) imefanya utafiti wa awali na kuainisha madini yanayopatikana katika Mkoa wa Mtwara hatua iliyosaidia wananchi kukata leseni ya utafiti na kujihusisha uchimbaji wa dhahabu ambao unawapatia kipato hasa katika maeneo ya Nanyumbu na Masasi mkoani humo.

Hayo yameelezwa leo Novemba Mosi 2023, Bungeni jijini Dodoma na Naibu Waziri wa Madini, Dkt, Steven Kiruswa, kwa niaba ya Waziri wa Madini, Mhe. Anthony Mavunde wakati akijibu swali namba 38 la Mbunge wa Viti Maalum Mhe. Tunza Issa Malapo aliyeuliza ni lini Serikali itafanya utafiti wa uwepo wa Madini Mkoani Mtwara.

Katika majibu yake, Dkt. Kiruswa amesema kuwa Serikali kupitia GST imefanya utafiti wa awali na kuainisha madini yapatikanayo katika Mkoa wa Mtwara.

“Mheshimiwa Spika, Miongoni mwa madini hayo ni kinywe; vito aina ya ruby, sapphire, rhodolite, amazonite na green tourmaline; metali aina ya dhahabu, shaba, manganese na chuma; madini ya viwanda kama marble na chokaa. Aidha, madini mengine ni mchanga wenye madini mazito yaani heavy minerals kama rutile, titanium, ilmenite, zircon na magnetite.” amesema Dkt. Kiruswa.

Aidha, akijibu swali la nyongeza la Mhe. Malapo aliyetaka kujua kama wananchi wa Mtwara wanafahamu kuhusu uwepo wa madini hayo, Dkt. Kiruswa amesema kuwa baada ya kufanya utafiti huo, GST ilitoa mrejesho kupitia Afisa Madini Mkoa Mtwara na kukabidhi machapisho ya madini kwa Mkuu wa Mkoa na Wilaya zote za Mkoa wa Mtwara.

Ameongeza kuwa wananchi wamepata mwamko wa kukata leseni za utafiti na uchimbaji ikilinganishwa na kipindi kabla ya utafiti hasa katika madini kama graphite lakini pia maeneo yenye dhahabu yamepelekea wananchi kujihusisha uchimbaji ambao unawapatia kipato hasa katika maeneo ya Nanyumbu na Masasi.