TPDC YAWALIPA FIDIA WANANCHI LINDI.

Mkurugenzi Mkuu wa Shirika la maendeleo ya petrol Tanzania  (TPDC) Dr. James Matarangio katikati akikabidhi mfano wa hundi ya Shilingi  Bilioni 2.036 kwa Mkuu wa Mkoa wa Lindi kulia kwake kwa ajili ya ulipaji wa fidia kwa wananchi wa Mto mkavu ili kupisha ujenzi wa Mradi wa Gesi asilia (LNG) na kulia ni Mkuu wa kitengo cha Mawasiliano na uhusiano TPDC,  Marie Msellemu

...............................................

Na HADIJA  HASSAN, LINDI.

SHIRIKA  la Maendeleo ya Petrol Tanzania TPDC limekamilisha zoezi la ulipaji wa fidia kwa wananchi  693 wa Mtaa wa Likong’o, Masasi ya leo na Mto mkavu ili kupisha Mradi wa kiwanda cha uchakataji wa Gesi asilia (LNG)  katika kata ya Mbanja  Manspaa ya Lindi Mkoani humo kwa kukabidhi  mfano wa hundi ya shilingi bilioni 5.2.

Akizungumza  wakati wa kukabidhi hundi hiyo Mkurugenzi Mkuu wa Shirika la Maendeleo ya Petrol Tanzania  TPDC , Dr.James Mataragio kwa Mkuu wa Mkoa wa Lindi Godfrey Zambi alisema kuwa  kati ya hizo Bilioni 5.2, bilioni  2.3 zitalipwa kwa wananchi wa Mtaa wa Likong’o na Masasi ya leo huku  bilioni 2.036 zitalipwa kwa Wananchi wa Mtaa wa Mto mkavu.

Dkt. Mataragio Alisema mpaka sasa zoezi hilo limekamilika kwa asilimia 88 ambapo Wananchi wapatao 617 kati ya 693 wameshasaini mikataba ya makubaliano baina yao na TPDC tayari kwa kulipwa fedha zao huku Wananchi 76 waliosalia wakiwa bado hawajakamilisha taratibu na nyaraka zao  zipo kwenye ukaguzi.

Aidha Dr, Mataragio aliongeza kuwa  zoezi hilo la utowaji wa Mfano wa  hundi linaenda sambamba na ulipaji wa fidia kwa wananchi ambapo mpaka sasa tayari wananchi mia tatu (300)  wa awamu ya kwanza wameshaingiziwa fedha zao Bank.

Hata hivyo Dkt. Mataragio alieleza kuwa hatua hiyo ya ulipaji wa fidia ni miongoni mwa mwendelezo wa hatua za  ujenzi wa kiwanda hicho kikubwa cha uchakataji wa Gesi asilia (LNG) ambao utagharimu Dolla za kimarekani bilioni 30.

Kwa upande wake Mkuu wa Mkoa wa Lindi, Godfrey Zambi akizungumza mara baada ya kukabidhiwa mfano huo wa  Hundi pamoja na kulipongeza Shirika hilo kwa kuendesha zoezi la ulipaji wa fidia  kwa uwazi pia alitoa onyo kwa wataalamu pamoja na wananchi wajanja wajanja kuanza kupeleka madai yasiyo kuwepo.

“kuna watu watakuja kufungwa hapa kwa sababu ya tamaa , hapa Lindi yupo mtu mmoja kila madai na migogoro ya Aridhi inapokuja nayeye lazima awepo kila mtaa yeye yupo tu sasa najiuliza huyo mtu kila mtaa ni wake? Kwa hivyo na hapa napigia hesabu tukiwaona watu kama hao tutawafunga” alitaadharisha Zambi.

“lakini pia niwaonye na wataalamu wetu wakati mwingine ipo tabia pia ya kuweka majina ya watu ambao hawakuwepo, majina hewa. Tusije tukaona majina hewa, na nadhani tulifanya pia vizuri ya  kuhakikisha kwamba kila mtu anakuja hapa anasimama  na anapiga picha mwenyewe” aliongeza Zambi.

Hata hivyo zambi alitilia mashaka kwa watu 76 ambao hawakujitokeza katika zoezi hilo huwenda yalikuwa ni majina hewa yaliyotengenezwa na wataalamu wa maeneo hayo ambao kulingana na uendeshaji wa zoezi lenyewe walishindwa kuwapata.

Mwalimu kibogoyo ni mmoja ya wa wananchi walioathirika na mradi huo ambapo pamoja na kukili kuingizia fedha yake ya fidia kwenye Ankaunt yake pia aliliomba shirika hilo kutoa muda wa kutosha ili wananchi wanaopisha mradi wapate muda wa kutosha wa kufanya maandalizi mapya ya makaazi yao mapya.