UGONJWA USIOFAHAMIKA DODOMA, WAGONJWA WAONGEZEKA NA KUFIKIA 32.

Ugonjwa usiofahamika ulioripotiwa katika wilaya za Chemba na Kondoa mkoani Dodoma umechukua sura mpya baada ya wagonjwa kuongezeka kutoka 21 June 19 na kufikia 32 June 24 mwaka huu.

Akitoa Taarifa kwa waandishi wa Habari leo jijini Dar es Salaam, Waziri wa afya, Maendeleo ya Jamii, Jinsia, Wanawake, Wazee na Watoto Ummy Mwalimu, alisema kuwa idadi hiyo imeongezeka baada ya kuripotiwa wagonjwa 11 katika kipindi cha wiki moja na kufanya jumla ya wagonjwa hao kufikia 32 huku watu waliofariki kutokana na ugonjwa huo kubakia 7 kama ilivyoripotiwa awali.

Alisema tangu ugonjwa huo kuanza wagonjwa 12 walipatiwa huduma ya matibabu katika Hospitali ya mkoa wa Dodoma, na wagonjwa 18 walipatiwa matibabu katika Hospitali ya wilaya ya Kondoa huku wagonjwa 2 hawakuwahi kulazwa Hospitali.

Aliongozea kuwa, hadi kufikia jana Hospitali ya mkoa wa Dodoma imebakiwa na wagonjwa 9 na Hospitali ya wilaya ya Kondoa imebaki na wagonjwa 14 ambapo wagonjwa 3 waliolazwa katika hospitali ya Mkoa wa Dodoma na 2 Hospitali ya wilaya ya Kondoa hali zao ni tete.

Alisema, atika jitihada za kutambua kiini cha ugonjwa huu, Wizara imepeleka jopo la Wataalam huko Dodoma ili waweze kushirikiana na wenzao walioko huko kufanya uchunguzi wa kina wa ugonjwa huo

Aidha, waziri Mwalimu, alisema sampuli mbalimbali zikiwemo damu, haja ndogo, haja kubwa, vinyama vya ini, na sampuli za vyakula zilipelekwa katika maabara za Mkemia Mkuu wa Serikali, Maabara ya Mamlaka ya Chakula na Dawa (TFDA), Maabara ya Taifa ya Magonjwa ya Binadamu na Maabara ya Hospitali ya KCMC (KCRI). Vile vile sampuli nyingine zimepelekwa nchini Marekani katika maabara ya Kituo cha Udhibiti wa Magonjwa cha Marekani (CDC) jijini Atlanta kwa ajili ya uchunguzi zaidi.

Alisema kuwa, hadi sasa, ni sampuli za nafaka pekee, zilizofanyiwa uchunguzi katika Maabara ya TFDA ndio zilizoonyesha kuwepo kwa uchafuzi wa sumukuvu (Aflatoxin) katika sampuli za nafaka hizo,

Waziri Mwalimu alizitaja sampuli hizo na kusema kuwa,

a)    Jumla ya sampuli 13 kati ya 27 (48%) zilikuwa na uchafuzi wa sumukuvu (aflatoxins) kwa kiasi kisichokubalika kwenye nafaka kwa mujibu wa viwango vya kitaifa na zote zilitokana na mahindi;

b)    Kati ya sampuli hizo zenye sumukuvu, 12 zilitoka wilaya ya Chemba na sampuli 1 ilitoka wilaya ya Kondoa.

c)    Sampuli saba (7) kati ya  hizo 12 zilikuwa na kiasi kikubwa cha sumukuvu kinachozidi 150 µg/kg (micrograms per kllogram) kwa total aflatoxins, ambapo wigo wa aflatoxin B1 katika sampuli hizo ni kati ya 157.1 – 194.4 µg/kg.

d)    Kiasi kama hicho kiliwahi kuhusishwa na madhara yatokanayo na sumukuvu (aflatoxins) katika nchi za India, China na Kenya.

e)    Dalili za madhara ya sumukuvu (aflatoxins)  zinafanana na dalili za ugonjwa usiofahamika uliojitokeza katika Wilaya za Chemba na Kondoa

Kufuatia uchunguzi huo waziri Ummy Mwalimu alisema upo uwezekano mkubwa kwamba ugonjwa huu umesababishwa na ulaji wa chakula kilichokuwa na sumukuvu na kuleta madhara.

Aliongeza kuwa, Ili kuwa na uhakika wa jambo hilo Wizara ya Afya, Maendeleo ya Jamii, Jinsia, Wanawake, Wazee na Watoto inasubiri matokeo ya vipimo vya damu na haja ndogo vilivyopelekwa kwa uchunguzi zaidi katika Maabara ya CDC, Atlanta iliyopo nchini Marekani ambapo majibu hayo yanatarajiwa kupatikana katika kipindi kisichozidi wiki moja.

Aidha, alisisitiza kuwa hayo ni matokeo ya awali ya uchunguzi unaondelea kufanyika ili kubaini hasa ni ugonjwa gani na unasababishwa na nini huku wizara ikiendelea kufanyia kazi matokeo hayo.

Alisema wizara itaendelea kutoa taarifa za mara kwa mara kwa wananchi kuhusu ugonjwa huo kadri taarifa muhimu zitakavyokuwa zikipatikana.

Waziri Mwalimu alitoa wito kwa jamii, kuendelea kushirikiana na wataalamu wanaoshughulika na ugonjwa huo, na pale atakapopatikana mgonjwa apelekwe haraka katika kituo cha Afya cha karibu, ili aweze kusaidiwa.