WANAOPITISHA MADAWA YA KULEVYA BAGAMOYO KUKIONA, SOBA HOUSE BAGAMOYO YAOKOA VIJANA.

Mkuu wa wilaya ya Bagamoyo, Alhaji, Majid Hemed Mwanga, (kushoto) akiwa na mkurugenzi wa SOBA HOUSE BAGAMOYO, Karim Banji kwenye maadhimisho ya siku ya kupinga madawa ya kulevya yaliyofanyika leo June 26, 2016 katika viwanja vya Majengo.

Mkuu wa wilaya ya Bagamoyo Alhaji, Majid Hemedi Mwanga, amewaonya wale wote wenye tabia ya kupitisha au kuingiza madawa ya kulevya katika wilaya ya Bagamoyo.

Alhaji, Majid alitoa onyo hilo lep mjini Bagamoyo wakati wa kuadhimisha siku ya kupinga madawa ya kulevya duniani, shughuli iliyofanyika katika viwanja vya Majengo.

Alisema kamati ya ulinzi na usalama wilaya akiwa yeye ni mwenyekiti imejipanga kuhakikisha kwamba kila aina mianya inayotumiwa na wauzaji na waingizaji wa madawa wilayani hapa inazibwa na kwamba atakaekamatwa hatua za kisheria zitachukuliwa dhidi yake.

Aidha, Mkuu huyo wa wilaya amepongeza juhudi zinazofanywa na kituo kinachowahudumia watu walioathirika na madawa ya kulevya cha Bagamoyo Soba House kwa kuwahudumia vijana na kurudi katika hali zao za kawaida.

Aliongeza kuwa serikali ya wilaya ya Bagamoyo itashirikiana na Soba House katika kuokoa masiha ya vijana, ili taifa libaki na nguvu kazi kwaajili ya maendeleo.

Aliitaka jamii kuacha kuwanyanyapaa wanaotumia madawa ya kulevya na badala yake jamii itoe msaada wa jinsi gani ya kuwasaidia watumiaji wa madawa ya kulevya.

Wakati huohuo amewataka viongozi wa dini wilayani hapa kuhakikisha wanasimamia maadili ya imani zao na kuwajenga vijana kiroho ili wasiingie katika dimbwi la matumizi ya madawa ya kulevya.

Kwa upande wake Mkurugenzi wa SOBA HOUSE Bagamoyo, Karim Banji alisema kituo hicho kimeanzishwa mwaka 2015 kikiwa na vijana 5 ambapo mpaka sasa kina vijana zaidi ya 45 kutoka katika mikoa mbalimbali ya Tanzania.

Alisema vijana wengi waliweza kufanikiwa kuacha kabisa matumizi ya madawa ya kulevya na kurejea katika hali zao za kawaida ambapo toka kuanzishwa kwa kituo hicho jumla ya vijana 100 wamehudumiwa na kurejea katika maeneo yao wakiwa katika hali nzuri akiwemo msanii wa Bongo fleva Chidi Benz ambae kwa sasa yuko vizuri.

Aidha alisema kuwa kituo kinakabiliwa na changamoto mbalimbali ikiwemo ukosefu wa majengo, na kuiomba serikali ya wilaya kuwawezesha kupata eneo kwaajili ya ujenzi wa kituo kwakuwa majengo yanayotumika sasa ni ya kukodi.