DC BAGAMOYO AFUNGA MAFUNZO YA MGAMBO.

Mkuu wa wilaya ya Bagamoyo, Alhaj, Majid Mwanga, akikagua gwaride kwa wahitimu wa mafunzo ya mgambo (jeshi la akiba) katika viwanja vya shule ya msngi Vigwaza Halmashauri ya chalinze.

Mkuu wa wilaya ya Bagamoyo, Alhaj, Majid Mwanga amefunga rasmi mafunzo ya mgambo yaliyoendeshwa ndani ya kata mbili za Makurunge na Vigwaza na kuwataka wawekezaji ndani ya wilaya ya Bagamoyo kuwatumia kwa shughuli  za ulinzi.

Alisema kufuatia viwanda vilivyopo wilayani Bagamoyo wahitimu hao wa jeshi la akiba wanapswa kupewa ajira ili wafaidike na fursa zilizopo ndani ya wilaya yao.

Alisema si vyema kuona wawekezaji wenye viwanda wanachukua walinzi nje ya bagamoyo hali ya kuwa wilaya hiyo imezalisha vijana wenye uwezo, waaminifu na wenye kujituma katka kazi ya ulinzi.

Aidha, mkuu huyo wa wilaya ya Bagamoyo aliwataka wahitimu hao kuwa waadilifu na kuchunga kiapo cha utii ili watekeleze majukumu yao kwa mujibu wa sheria.

Akitoa Taarifa ya mafunzo Mshauri wa mgambo wilaya ya Bagamoyo, Kapteni Matonya alisema ofisi yake inatoa shukrani kwa ofisi ya mkuu wa wilaya kwa kuonyesha ushirikiano kuanzia mwanzo hadi mwisho wa mafunzo hayo.

Alisema mafunzo hayo yamekabiliwa na chnagamoto mbalimbali ikiwemo baadhi ya wanafunzi kushindwa kumudu gharama za kuchangia michango mbali mbali inayohusu mafunzo kutokana na uwezo mdogo wa kifedha.

Mafunzo hayo ya jeshi la akiba wilayani Bagamoyo yalianza rasmi Tarehe 01 julai 2017 katika kata za Makurunge na Vigwaza yalikuwa na wanafunzi 176 ambapo waliofanikiwa kuhitimu ni wanafunzi 144 ambao kati yao wanaume ni 121 na wanawake ni 23.

Wahitimu wa jeshi la akiba wakipita mbele ya mgeni rasmi, Mwenyekiti wa kamati ya ulinzi na usalama ambae ni mkuu wa wilaya ya Bagamoyo, Ahaj, Majid Mwanga.