ETDCO YAENDELEA KUJENGA MIUNDO MBINU YA KUSAFIRISHA UMEME MRADI WA TABORA - KATAVI 132kV

 

Kaimu Meneja Mkuu Kampuni ya ETDCO CPA Sadock Mugendi, Amesema Wanaendelea kujenga miundo mbinu ya Umeme Nchini ikiwemo Njia ya kusafirisha umeme kutoka  Tabora  hadi Katavi ambao ni mradi wa kusafirisha  Umeme na tayari  Mradi Umefkia Asilimia 67.

Mugendi amesema ETDCO ni kampuni Tanzu ya Shirika la Umeme Tanzania na ni suluhisho la miundo mbinu ya umeme kwani ipo kwa ajili ya kujenga na kukarabati miundo mbinu ya kusafirisha na kusambaza umeme.

Kaimu Meneja Mkuu CPA Sadock Amesema Mradi wa Kutoka Tabora kwenda Katavi wenye Urefu wa kilometa 383 wa msongo wa 132kV ambao Unatarajiwa kumalizika Mwaka huu kupelekea    Mkoa wa Katavi kupata  Umeme wa Uhakika pia Kuipunguzia Gharama Tanesco za Kununua Mafuta ya Dizeli kwajili ya Jenereta ili kuzalisha Umeme kwenye Mkoa Wa Katavi.

CPA Sadock Ameipongeza Serikali kuendelea kuwekeza kwenye Sekta ya Nishati ili Kuhudumia Wananchi wake vizuri, Amesema Hayo Wakati Akitembelea Mradi wa Kimkakati wa Tabora kwenda Katavi wenye msongo wa 132kV.

KIKWETE MWENYEKITI WA BARAZA LA WAZEE WA SADC YUKO LESOTHO

 

NA MWANDISHI WETU, LESOTHO

Mheshimiwa Dkt. Jakaya Mrisho Kikwete, Rais Mstaafu wa Jamhuri ya Muungano wa Tanzania, leo tarehe 26 Juni, 2024, yuko katika Ufalme wa Lesotho kwa nafasi yake kama Mwenyekiti wa Jopo la Wazee wa Jumuiya ya Maendeleo Kusini mwa Afrika (SADC).

Jopo hili la Wazee wa SADC ambalo Makamu Mwenyekiti wake Mheshimiwa Paramasivum Pillay B. Vyapoory, Makamu wa Rais Mstaafu wa Jamhuri ya Mauritius, limekutana na Serikali na wadau mbalimbali ndani ya Ufalme wa Lesotho, kama mwendelezo wa juhudi ya kusaidia upatikanaji wa utulivu wa kisiasa katika Ufalme huo. 

Jopo limekutana na Mhe. Ntsokoane Samuel Matekane, Waziri Mkuu wa Ufalme wa Lesotho; Mhe. Nthomeng Justina Majara, Naibu Waziri Mkuu na Waziri wa Sheria na Masuala ya Bunge; Mhe. Mamonaheng Mokitimi, Mwenyekiti wa Seneti; Viongozi wa Vyama vya Upinzani; Mhe. Constance Seoposengwe, Balozi wa Afrika Kusini nchini Lesotho na wadau mbalimbali.

WAZIRI MKUU AZINDUA VITABU VYA HISTORIA YA BUNGE

 

Waziri Mkuu Kassim Majaliwa amezindua vitabu vya historia ya Bunge ambavyo vitasaidia kuhamasisha tafiti na kujua zaidi kuhusu mchango wa Bunge katika maendeleo ya jamii nchini.

Amesema kuwa vitabu hivyo pia vitakuwa kielelezo cha mafanikio na changamoto ilizopitia Bunge la Tanzania katika kudumisha demokrasia na utawala wa sheria. “Historia yetu ni sehemu ya mchango wetu kwa jumuiya ya kimataifa katika kukuza amani, utulivu na maendeleo.”

Amesema hayo leo (Jumatano, Juni 26, 2024) wakati wa uzinduzi wa vitabu viwili vya historia ya bunge katika ukumbi wa Pius Msekwa, Jijini Dodoma.Vitabu vilivyozinduliwa ni Kitabu cha Historia ya Bunge kutoka 1926-2024 na Wabunge wa Tanzania na nafasi zao kuanzia mwaka 1965-2023

“Kumbukumbu za historia ya Bunge zinaweza kuchochea utafiti wa kitaaluma na maendeleo ya nadharia za kisiasa na utawala. Watafiti wanaweza kutumia taarifa hizi kujenga ufahamu mpya na kupendekeza mifumo bora ya kisiasa.”

Kwa upande wake Spika wa Bunge Dkt. Tulia Ackson amepongeza Rais Dkt. Samia Suluhu Hassan kwa kuwa sehemu ya maono ya bunge ikiwemo kuridhia kulikabidhi bunge maeneo yote yanayozunguka jengo la bunge.

“Tunatarajia kujenga makumbusho ya bunge ambayo yatakuwa ni makubwa kwa nchi nzima ili mtu anapokuja bungeni apate historia ambayo tumeipitia kama nchi lakini pia historia ya bunge letu”

TANESCO, WAWEKEZAJI BINAFSI LUDEWA WAFIKIA MAKUBALIANO

 

TANESCO, WAWEKEZAJI BINAFSI LUDEWA WAFIKIA MAKUBALIANO

Ni kuhusu TANESCO kukabidhiwa  miundombinu ya kusambaza umeme*

Ludewa kujengwa kituo cha Kupokea na Kupoza umeme

Kapinga asema Vijiji 70  kati ya  76 Mbulu vimepatiwa umeme

Imeelezwa kuwa, Serikali na Wawekezaji wanaowauzia umeme wananchi katika baadhi ya kata za Wilaya ya Ludewa mkoani Njombe wamefikia makubaliano ya kisheria ili miundombinu ya usambazaji umeme katika Kata hizo ikabidhiwe kwa Shirika la Umeme Tanzania  (TANESCO).

Hayo yamesemwa na Naibu Waziri wa Nishati, Mhe. Judith Kapinga leo Juni 26, 2024 bungeni jijini Dodoma wakati akijibu maswali mbalimbali ya Waheshimiwa Wabunge akiwemo Mbunge wa Ludewa, Mhe. Zacharius Kamonga aliyetaka kufahamu Serikali itamaliza lini changamoto za bei na mgao wa umeme katika Kata hizo.

Kapinga ameongeza kuwa, hatua zote za makabidhiano zinatarajiwa kukamilika mwishoni mwa Mwezi Julai, 2024 na baada ya kukamilika, TANESCO watabadilisha mita za umeme ili ziendane na mifumo ya TANESCO na kuwawezesha wananchi wa Kata hizo kutumia umeme wa Gridi ya Taifa.

Alitaja Kata hizo kuwa ni Mawengi, Lubonde, Lugarawa, Lupanga, Mlangali, Madilu, Milo na Mawengi ambazo  zimekuwa zikipata umeme kutoka kwa Wawekezaji binafsi (JUWUMA na MADOPE HCL.

Kuhusu ujenzi wa kituo cha kupokea na kupoza umeme kujengwa katika Wilaya ya Ludewa,  amesema Serikali inaangalia namna bora ya kutekeleza ujenzi huo ikiwa ni pamoja na kutumia Mpango wa Gridi Imara.

Amesisitiza kuwa, Wananchi wa Ludewa wanahitaji umeme mwingi na wa uhakika kwa ajili ya kuendeshea shughuli zao vikiwemo viwanda vidogo na vikubwa. 

Vilevile amesema kuwa, Serikali kupitia Mkandarasi  Ok Electrical inatekeleza mradi wa ujenzi wa njia ya kusafirisha umeme na tayari mkandarasi  ameshafanya upimaji na usanifu wa kina na mwanzoni mwa mwezi Julai 2024 anatarajiwa kuanza kusimika nguzo  ili kuziunganisha Kata hizo na Gridi ya Taifa.

Katika hatua nyingine, Serikali imemtaka  mkandarasi anayetekeleza mradi wa Usambazaji wa umeme katika  Vijiji vilivyopo  mwambao wa Ziwa Nyasa, kukamilisha utekelezaji wa mradi huo kwa wakati.

Naibu Waziri Kapinga amesema  kuwa iwapo mkandarasi huyo atashindwa kukamilisha mradi huo kwa muda uliopangwa, atachukuliwa hatua kali za kisheria ikiwemo wakandarasi wengine wazembe.

Pia, Kapinga amesema Serikali inaendelea 

 na usambazaji wa umeme vijijini katika Wilaya ya Mbulu   ambapo vijiji 70 kati ya 76 vimeshapatiwa umeme kupitia REA.

Aidha, kazi ya usambazaji umeme katika Vijiji  6 vilivyosalia inaendelea ambapo mkandarasi anafanya  kazi ya kuvuta waya na kuweka Mashineumba katika vijiji hivyo.

Pia Mradi wa Ujazilizi utapeleka umeme  katika Vitongoji vyote nchini kwa awamu tofauti.

CTI YALIA NA UTITIRI WA TOZO MIKOANI

 

Na Mwandishi Wetu

 

SHIRIKISHO la Wenye Viwanda (CTI), limeseme kuwepo kwa utitiri wa tozo katika kila mkoa na halmashauri kumekuwa kikwazo katika ustawi wa biashara na uwekezaji nchini.

 

Hayo yalisemwa  jijini Dar es Salaam na Mkurugenzi wa Shirikisho hilo, Leodegar Tenga katika warsha maalumu ya kuwajengea uwezo wadau wa sekta ya viwanda vya chakula na vinywaji kupitia utafiti uliofanywa na Mkurugenzi wa Taasisi ya Utawala Bora na Maendeleo ya Wajasiriamali, Dk. Donath Olomi.

 

Utafiti huo ulioangazia namna tozo hizo zilivyo kikwazo kwa wafanyabiashara kwenye maeneo mbalimbali nchini.

 

Tenga alisema Dk Olomi ni mtafiti msomi na ameainisha vitu vingi ikiwemo mapendekezo ya kufuata kuondoa vikwazo hivyo, akisisitiza kuwa lengo ni kuwapa nafasi nzuri wafanyabiashara wakubwa wanaotamani kuja kuwekeza nchini.

 

Tenga alisema athari ya utofauti wa tozo unaathari kibiashara ikiwamo kuongezeka kwa bei za bidhaa, na hivyo kusababisha  mlaji kununua bidhaa ya bei ndogo kwa gharama kubwa.

 

“Kwa mfano mtu amevuna mazao yake Mbeya sasa ili aje kuuza Dar es Salaam kwenye soko kubwa atalazimika kusafirisha, sasa anatozwa huko  akifika Iringa anatozwa tena, njiani pia hivyohivyo anakutana na tozo nyingine akifika Dar es Salaam nako anakutana na tozo nyingine,” alisema.

 

“Tunataka huyu mfanyabiashara akishatozwa Mbeya asitozwe tena sehemu nyingine, tunapaswa tuwe na utaratibu ambao utatambua kama ameshatozwa, hatujafanikiwa kuondoa vikwazo. Tusipofanya hivyo tunawakwamisha hawa wafanyabiashara au watafanya ujanja wa kutoa rushwa njiani ili kupunguza hizo tozo,” alisema Tenga

 

Naye Dk. Olomi alisema kutokana na utafiti alioufanya alipendekeza kuwe na uwazi kuhusu  tozo hizo akifafanua kwamba katika halmashauri karibu zote tozo hizo hazijatangazwa mahali popote hivyo mwekezaji anayataka kuwekeza hawezi kujua viwango vya tozo na kama ziko kwa mujibu wa sheria au siyo.

 

Pia alipendekeza serikali iangalie namna ya kuondoa tozo zinazokinzana na kujirudia rudia kwenye mikoa na halmashauri nchini akitolea mfano kwamba mtu akiingiza lori mjini (kariakoo) kwaajili ya kupakia au kuondoa bidhaa atakutana na tozo ya maegesho.

 

Alisema pia lori hilo litatozwa malipo ya kuingia katikati ya Jiji na wakati mwingine haijulikani wapi ni mwisho wa kulipia kwa hiyo kuna maeneo kama hayo yanahitaji marekebisho.

 

Alisema mkanganyiko mwingine ni zile tozo zinazotozwa na halmashauri na nyingine serikali kuu. “kwa mfano tozo ya kupima afya kwenye viwanda unatozwa na Wakala wa Usalama na Afya Mahala Pa kazi (OSHA) lakini pia serikali za mitaaa kiutaratibu zinatofautiana kama unapima  magonjwa yanayoambukizwa unapimwa na halmashauri na yale yasiyoambukiza unapimwa na OSHA na tozo wanayotoza kwa mtu mmoja ni sh 70,000 sasa ukiangalia hii haijakaa sawa,”

 

“Hizi tozo zisiwepo kama zinania ya kukomoa wenye viwanda bali zitumike kuweka mazingira mazuri kwahiyo kuna changamoto za aina hiyo,” alisema Dk Olomi

 

Mhandisi wa Viwanda Mkuu Kutoka Wizara ya Viwanda na Biashara, Karoline Varelian alisema serikali itachukua  mapendekezo ya wadau hao, kuchambua na kuyafanyia kazi ili kuweka mazingira rafiki.

 

Alisema tayari Wizara imeshaanza kuzifanyia marekebisho baadhi ya sera na sheria ila kwa sasa watakwenda kuyafanyia kazi kwa haraka mapendekezo yaliyotolewa na wadau ili kuondoa mlalamiko ya wenye viwanda.

 

Alisema tozo zimekuwa nyingi  na kuahidi kuwa  watapitia ushauri uliotolewa kwenye utafiti uliofanywa na Dk Olomi ili kuwapunguzia mzigo wafanyabiashara hususani wenye viwanda vya chakula na vinywaji.

CTI YASEMA BAJETI ITASISIMUA UKUAJI WA VIWANDA

 Na Mwandishi Wetu

SHIRIKISHO la Wenye Viwanda nchini (CTI), limepongeza bajeti kuu ya serikali kwa kuweka mambo muhimu ambayo yatachochea ukuaji wa viwanda nchini.

 

Hayo yamesemwa leo jijini Dar es Salaam na Mkurugenzi wa shirikisho hilo, Leodegar Tenga, wakati akizungumza na waandishi wa habari.

 

Amesema serikali imekuwa sikivu kwa wenye viwanda na kila wanapokuwa na jambo wamekuwa wakifunguliwa milango ya majadiliano na kwamba hakuna jambo la wenye viwanda ambalo linakwama.

 

Amesema wenye viwanda wamefurahia sana bajeti ya serikali kwa kuzingatia uendelezaji wa miradi ya kimkakati kama reli ya kisasa SGR ambayo alisema itasiadia kwa kiwango kikubwa kukuza viwanda vya  ndani kuzalisha kwa wingi bidhaa.

 

Amesema miradi kama SGR inasaidia kukuza uchumi kwani viwanda vitazalisha kwa wingi na bidhaa kusafirishwa kwa urahisi tofauti na sasa ambapo usafirishaji umekuwa ukisababisha bei kupanda.

 

“Nchi ambayo iko makini inaendeleza miradi mikubwa kama ya ujenzi wa reli, barabara, miradi ya maji kama kuendeleza miradi ya kimkakati barabara maji, bandari kwasabbau huwezi kuendeleza viwanda kama huna umeme au unamatatizo ya usafirishaji,” alisema tenga

“Mfano bei ya mfuko wa saruji hapa Dar inaweza kuwa shilingi 16, 000 au 17,000 lakini bei ya kuubeba mpaka Mwanza ni kati y ash 10,000 hadi 12,000 kwa hiyo mtu ananunua mfuko wa saruji hapa kwa 16, 000 lakini mpaka kuufikisha Mwanza unauzwa shilingi 28,000,” alisema

“SGR itapunguza gharama ya usafirishaji na bei ya bidhaa itapungua sana na itasaidia sana viwanda vya ndani kukua na kuongeza mapato na ni vizuri serikali inapofanya vizuri sekta binafsi tuseme kwamba inafanya vizuri,” alisema.

Tenga alisema bajeti ya mwaka huu inakusudia kuhamasisha mapato ya ndani zaidi ikilinganishwa na bajeti ya 2023/24.

Amesema jambo muhimu katika bajeti ya mwaka huu ni Serikali kufanya mageuzi mbalimbali ya muundo wa kodi, ada, tozo na marekebisho ya sheria na kanuni ili kuboresha mazingira ya biashara.

 

Amesema marekebisho ambayo yamependekezwa kuhusiana na sekta ya viwanda ni katika ongezeko la thamani VAT, ushuru wa bidhaa, ada na tozo za wakala pamoja na ushuru wa forodha.

 

Tenga amesema baadhi ya hatua chanya ni pamoja na kuanzishwa kwa tozo ya maendeleo ya viwanda kwa bidhaa zinazotoka nje yenye lengo la kulinda viwanda vya ndani, kuchochea uwekezaji na kuongeza mauzo ya nje; kupunguza ada na tozo zinazotolewa na vyombo vya udhibiti ili kupunguza gharama za uzalishaji.

 

Amesema pia wamefurahishwa na kupunguzwa kwa ushuru wa forodha kwenye malighafi za viwandani na pembejeo za uzalishaji ili kuongeza ushindani wa viwanda vya ndani na kutozwa ushuru wa VAT kwenye bidhaa za nguo zinazotengenezwa kwa pamba inayolimwa hapa nchini ili kuchochea uwekezaji katika viwanda vya nguo vya ndani.

 

Amesema hatua za kodi zilizopendekezwa hapo juu zinalenga kusaidia viwanda vya ndani katika kupunguza gharama za uzalishaji, kuhimiza matumizi ya vifaa vya ndani, kuongeza ushindani, na kukuza ukuaji wa uchumi.

 

DKT. MPANGO AFANYA MAZUNGUMZO NA MKURUGENZI WA TAASISI YA KIMATAIFA YA UWEKEZAJI YA UINGEREZA.

 

Makamu wa Rais wa Jamhuri ya Muungano wa Tanzania Mhe. Dkt. Philip Mpango amekutana na kufanya mazungumzo na Mkurugenzi Mtendaji wa Taasisi ya Kimataifa ya Uwekezaji ya Uingereza (BII) Nick O’Donohoe na ujumbe wake, mazungumzo yaliyofanyika Ikulu, Dodoma.

 

Katika Mazungumzo hayo, Makamu wa Rais ameipongeza Taasisi hiyo kwa kuendelea kuwekeza nchini tangu mwaka 1949 katika sekta muhimu na za kipaumbele kwa uchumi wa Taifa ikiwemo Nishati, Kilimo na Chakula, Misitu, Huduma za Fedha, Huduma za Mawasiliano pamoja na kushirikiana na Benki za Tanzania ikiwemo Benki ya NMB.

 

Makamu wa Rais amesema Serikali ya Awamu ya Sita inayoongozwa na Rais Mhe. Dkt. Samia Suluhu Hassan, imeweka mkazo katika kuendelea kufungua uchumi kwa kufanya mageuzi muhimu yanayochochea na kuvutia biashara na uwekezaji. Ameongeza kwamba Serikali imeendelea kufanya mageuzi ya kisera kwa kuhakikisha sera na sheria zinazotabirika. Aidha, Serikali inaendelea kufanya mageuzi ya kitaasisi ili kuhakikisha mazingira ya biashara na uwekezaji yanakuwa salama.

 

Amesema Uchumi wa Tanzania umeendelea kuimarika licha ya changamoto mbalimbali zinazoikumba dunia kwa sasa.

 

Vilevile, amewakaribisha kushirikiana na Tanzania katika kufanikisha matumizi ya nishati safi ya kupikia ili kulinda misitu na mazingira kwa ujumla.

 

Kwa upande wake Mkurugenzi Mtendaji wa Taasisi ya Kimataifa ya Uwekezaji ya Uingereza (BII) Bw. Nick O’Donohoe amesema Taasisi hiyo itaendelea kushirikiana na Tanzania katika sekta mbalimbali ikiwemo ya Nishati hususani nishati ya jua na upepo. Pia kuunga mkono uboreshaji wa miundombinu ya usafirishaji umeme, Kilimo pamoja na miundombinu ya uhifadhi wa mazao ya mbogamboga na maua.

 

Bwana O’Donohoe amesema nchi ya Tanzania imekua moja ya nchi zenye uchumi imara na unaokuwa kwa kwa kasi na hivyo kuvutia wawekezaji. Ameishukuru Serikali kwa mazingira wezeshi kwa Taaasisi hiyo katika kutekeleza miradi mbalimbali.

 

Mazungumzo hayo yamehudhuriwa na Mkuu wa Taasisi ya BII Afrika Bw. Chris Chijuitomi na Mkuu wa Mipango Bw. John Trees. Ujumbe wa Tanzania ni pamoja na Naibu Waziri wa Ofisi ya Rais Mipango na Uwekezaji Mhe. Stanslaus Nyongo, Naibu Katibu Mkuu Wizara ya Nishati Dkt. James Mataragio, Balozi wa Tanzania nchini Uingereza Mhe. Mbelwa Kairuki pamoja na Mkurugenzi wa Biashara ya Kimataifa na Diplomaisa ya Kiuchumi Wizara ya Mambo ya Nje na Ushirikiano wa Afrika Mashariki Balozi John Ulanga.

Imetolewa na

Ofisi ya Makamu wa Rais

18 Juni 2024

Dodoma.

RC LINDI AZIAGIZA HALMASHAURI KUANZISHA NA KUHUWISHA MADAWATI YA ULINZI MASHULENI

 

NA HADIJA OMARY, LINDI.

Mkuu wa Mkoa wa Lindi ameziagiza Halmashauri zote za Mkoa huo kuhakikisha zinafufua au kuunda madawati ya ulinzi ya watoto  sambamba na kuunda klabu za watoto mashuleni zitakazowasaidia kuelezea na kutatua changamoto zao

Akizungumza wakati wa maadhimisho ya siku ya Mtoto wa Afrika yaliyofanyika kimkoa huko katika kijiji cha chienjele halmashauri ya Ruangwa Jana Juny 16/2024 kwa niaba ya Mkuu wa Mkoa wa Lindi , Mkuu wa Mkoa wa Mtwara Patrick Sawale  amesema vyombo hivyo ni  muhimu  kwa ajili ya kutetea maslahi yao pindi watoto wanapokuwa wamefanyiwa ukatili. 

Amesema ili Taifa liweze kuendelea kupiga hatua ni muhimu kutilia maanani mahitaji  ya watoto  ikiwa pamoja na watoto  masikini , walemavu na walio na mazingira magumu zaidi kutengewa mafungu toka katika bajeti kuu ya serikali na zile za Halmashauri.

hata hivyo ameendelea  kuikumbusha Jamii kuwa inawajibu wa  kutoa taarifa na ushahidi kuhusu mtoto ambae haki zake zinakiukwa na wazazi na walezi au ndugu yoyote kwenye  serikali za mitaa na kwenye vyombo vya dola kwa vitendo vya ulawiti, ubakaji na ukatili  wanaofanyiwa  watoto  ili serikali ichukue hatua na adhabu zitolewe.

Akitoa salamu za Wilaya ya Ruangwa Mkuu wa Wilaya hiyo Hassan Ngoma amesema siku hiyo ya Mtoto wa Afrika ni muhimu kwa Nchi za Afrika kutathimini na kueleza Dunia mabadiliko Makubwa yaliyofanywa na Nchi hizo Katika kuwapambania watoto hao Katika kuondoa changamoto mbalimbali ikiwa ni pamoja na ubaguzi wa rangi unyanyapaa Elimu na kadhalika

 

Awali afisa maendeleo ya jamii Mkoa wa Lindi ndugu Charles Kigahe alieleza changamoto kadhaa zinazowakabili watoto wa Mkoa huo wa Lindi 

Miongoni changamoto hizo ni pamoja na Watoto kutotimiziwa haki ya kupata elimu, hii imetokana na wazazi kutoona umuhimu wa kuwafuatilia watoto pindi wakiwa shuleni ambapo imesababisha watoto kuacha shule.

Watoto kukosa malezi ya wazazi, hii imetokana na wazazi kutengana ambapo mtoto anaendelea kulelewa na mzazi mmoja au bibi. Watoto kukosa mahitaji ya msingi kwa sababu ya kutoelewana kwa wazazi,

Watoto kufanyiwa ukatili wa kingono.

Changamoto nyingine ni Migogoro ya ndoa kwa wazazi,  ambapo wazazi wanaachana inapelekea mtoto kuendelea kuhangaika na hatimaye kuacha shule.

Wazazi na walezi hawatimizi wajibu wao wa kuwalea watoto ambapo inasababisha kuongezeka kwa watoto wa mtaani.

Kauli mbiu ya siku ya Mtoto wa Afrika 2024 ni Elimu jumuishi kwa watoto izingatie maadili, maarifa na stadi za kazi

SERIKALI YAENDELEZA JITAHADA ZA KUKABILIANA NA CHANGAMOTO YA TEMBO

 

NA HADIJA OMARY, LINDI.

Serikali kupitia Wizara ya Maliasili na utalii imeendelea kujenga vituo  kupeleka asikari wa wanyama pori pamoja na vitendea kazi Katika maeneo yote yenye changamoto ya wanyama wakali na waharibifu aina ya Tembo ili kukabiliana na changamoto hiyo

Hayo yameelezwa na Mratibu wa Mradi wa kutatua changamoto ya migongano baina ya binaadamu na Wanyama pori unaotekelezwa Katika wiliya za Liwale Mkoani Lindi, Namtumbo na Tunduru Mkoani Ruvuma Bw.Gideon Mseja alipokuwa anafungua mafunzo ya siku moja kwa waadishi wa vyombo mbalimbali vya habari yaliyofanyika huko Wilayani Tunduru Mkoani Ruvuma

Mafunzo hayo yamewakutananisha waandishi 10 kutoka Katika Maeneo ya utekelezaji wa Mradi maafisa habari wa halmashauri , wawakilishi kutoka kitengo cha  mawasiliano wizara ya maliasili na utalii pamoja na maafisa Wa Serikali 

Amesema changamoto hiyo ya wanyama wakali na waharibifu imeathiri Katika wilaya 44 ambapo Serikali imeendelea kuchukua Hatua mbalimbali Katika kukabiliana nayo ikiwa ni pamoja na kufanya Doria za mara kwa mara kujenga vituo vya asikari wa wanyama pori.

Jitihada zingine ni pamoja na kuwezesha vifaa vya kuondoa tembo maeneo ya wananchi, kufuatilia mienendo ya wanyamapori, kutumia helikopta na mabomu baridi kuwaondoa tembo kwenye makazi, kuwezesha wananchi kiuchumi na kutoa elimu ya tabia ya tembo na mbinu ya kutatua migongano hiyo kwa jamii ili kujenga uhimilivu wa matukio hayo.

"Lakini pia Serikali imekuwa ikifuatilia mienendo ya wanyama kuona mzunguko wao ambapo  kupitia  TAWIRI Tembo wamefungwa vifaa vinavyoweza kutoa taarifa mapema endapo wanyama wanakaribia Maeneo ya Jamii basi asikari waweze kusogea pale ili wanyama hao wasisababishe madhara kwa wananchi"

Hata hivyo ameongeza kuwa Katika kuendelea kukabiliana na changamoto hiyo, Serikali imeanzisha Mradi wa mashirikiano kati ya Tanzania na ujerumani unaolenga kutatua migongano baina ya Binaadamu na Wanyama pori  unaotekelezwa kwenye ukanda wa Ruvuma unaolenga kutoa elimu ya namna sahihi ya kuandika habari zinazohusu migongano hiyo  kwa usahihi

Kwa upande wake Mkurugenzi wa chama cha waandishi wa habari za mazinginra (JET) Bw.John Chikomo amesema Mradi huo wa kudhibiti migongano baina ya binadamu na Wanyama pori upo chini ya   wizara ya maliasili na utalii kupitia ufadhili  wa Serikali ya Ujerumani  (MBZ) kupitia Shirika la maendeo la ujerumani (GIZ) unatekelezwa na (JET) kwa kuwajengea uwezo waandishi wa habari ili waweze kuripoti vyema habari hizo za migongano baina ya Binaadamu na Wanyama pori

"Mradi huu utawawezesha waandishi wa habari kuweza kuandika habari hizo kwa usahihi ili wananchi wanaoishi Katika Maeneo ya shoroba za wilaya hizo tatu wapate uelewa wa kujua namna gani ya kupambana na hiyo Hali ambayo wanakutana nayo"

" Ni wazi kuwa maswala haya ya migongano baina ya binadamu na Wanyama pori yamekuwa ni mengi kwenye magazeti tunasoma, kwenye TV tunaona kwamba Kumekuwa na ongezeko la wanyama kuingia Katika Maeneo ya makazi, mashamba kwa hivyo lengo kubwa ni kuwajengea uwezo waandishi wa habari wa Tanzania hususani wa wilaya hizi waweze kuandika habari za ufasaha zaidi bila kuleta taharuki kwa wananchi hao" alisema Chikomo

Kwa Upande wake Mtaalam Mshauri wa Mradi huo  wa kutatua  Migongano baina ya Binadamu na Wanyamapori kutoka  Shirika la maendeo la ujerumani GIZ, Bi. Ana Kimambo alitumia fursa hiyo kuwaasa waandishi wa habari waliopatiwa mafunzo , kuyatumia mafunzo hayo Katika kuleta matokeo chanya Katika Jamii zao kwa kuandika habari zenye usahihi

" Baada ya mafunzo haya tutapenda kuona sasa taarifa zile zinazo ripotiwa hasa  ukanda huu zinakuwa na mabadiliko ya kuelimisha zaidi pamoja na kufikisha ujumbe wa uhalisia , hakikisha unachokiandika  unaandika kwa usahihi kulingana na taarifa yenyewe ilivyo"

Kumekuwa na upotoshaji unaofanywa na baadhi ya waandishi wa habari ambao ndio unaozua taharuki kwa wananchi na hiyo ndio inayopelekea wananchi waweze kuona kuwa haya matukio kwamba yana ukubwa zaidi tofauti na uhalisia wenyewe  usiiandike Tu kwa sababu unataka gazeti lako liweze kuuzwa,  amesema waandishi hao wanapatiwa mafunzo hayo ili wanapoenda kwenye Jamii waweze kuielimisha kwa ufasaha

Kwa upande wake Joyce Joliga mwandishi wa habari wa Gazeti la mwanachi amesema kupitia mafunzo hayo ameeleza kujifunza namna Bora ya kuandika habari hizo za migongano ya Binaadamu na Wanyama pori kwa weledi tofauti na hapo awali ambapo alikuwa akiandika habari hizo kwa kutumia uzoefu wa uandishi wa habari kimazoea

WAZIRI MKUU ATOA MAAGIZO KWA WATUMISHI WA UMMA

 

Awataka waondoe urasimu na kutowasumbua wananchi wanaowahudumia

 

WAZIRI MKUU Kassim Majaliwa amewataka watumishi wa umma nchini kote wawatumikie wananchi ipasavyo na wahakikishe wanaondoa urasimu kwa kutowasumbua wananchi wanaokuja kupata huduma za kiserikali katika ofisi zao.

“Epukeni tabia ya kuomba na kupokea rushwa, rushwa inaharibu maendeleo. Tusitumie maneno magumu kwa wananchi wetu maana eneo hili bado ni changamoto, tunalishughulikia au bado tupo kwenye mchakato, tunafanya tathmini, upembuzi yakinifu, tumieni lugha rahisi.“

Pia, Waziri Mkuu amewataka watumishi hao wazingatie taaluma zao na watoe ushauri kwa kuzingatia Sheria, Kanuni na Taratibu za Utumishi wa Umma, wafike sehemu ya kazi kwa muda uliopangwa na watumie muda huo kufanya kazi za Serikali na waepuke kuwa na migongano ya maslahi katika kutekeleza majukumu na kusimamia rasilimali za umma.

Waziri Mkuu ameyasema hayo leo (Jumatano, Juni 12, 2024) kwenye Mkutano Mkuu wa 14 wa Taasisi ya Maboresho ya Serikali za Mitaa Tanzania (TOA) unaofanyika katika Ukumbi wa Kituo cha Mikutano cha Kimataifa Arusha (AICC) jijini Arusha.

“Viongozi wote tuwahudumie wananchi kwa heshima, staha, unyenyekevu na umakini mkubwa ikiwa ni pamoja na kuwapa majibu sahihi ya maswali yao na majawabu sahihi ya kero zinazowasumbua. Toeni ufafanuzi au maelekezo juu ya masuala yatokanayo na sheria, kanuni na taratibu za Serikali kwa haraka, uwazi na bila upendeleo wowote au ubaguzi wa aina yoyote.”

Mheshimiwa Majaliwa amesema Serikali ya Awamu ya Sita inayoongozwa na Mheshimiwa Rais Dkt Samia Suluhu Hassan imedhamiria kuhakikisha wananchi wote wanapata maendeleo na huduma mbalimbali za msingi.

Amesema chombo muhimu cha kuhakikisha maendeleo yanafika kwa wananchi wa ngazi ya msingi ni Mamlaka za Serikali za Mitaa na maendeleo hayo yatakuwa dhahiri na endelevu endapo wananchi watashirikishwa katika kuainisha changamoto zinazowakabili na watawezeshwa kukabiliana nazo kwa kutumia rasilimali zinazowazunguka.

Pia, Waziri Mkuu amewataka Wakurugenzi wa Halmashauri wahakikishe wanakuwa na mifumo madhubuti ya ukusanyaji na usimamizi wa mapato pamoja na kuweka mkakati wa udhibiti wa mali zilizopo ndani ya halmashauri na mapato watakayoyapata wayaelekeze katika kukamilisha miradi ya maendeleo inayotekelezwa katika halmashauri zao.

RAIS DK.MWINYI AISHUKURU TAASISI YA AL MAZRUI

 

Rais wa Zanzibar na Mwenyekiti wa Baraza la Mapinduzi Mhe. Dk. Hussein Ali Mwinyi ameishukuru Taasisi ya Al Mazrui Charitable Organisation ya Abu Dhabi kwa kuendelea kutoa huduma mbalimbali za kijamii ikiwemo afya , elimu na maji.

Pia ameishukuru taasisi hiyo  kwa kutoa jengo lao kwa Serikali ilitumie kwa huduma za afya.

Rais Dk.Mwinyi ameyasema hayo akizungumza na vijana wa Chuo cha ufundi Mubarak AL Mazrui  na alipotembelea eneo hilo Mkoa wa Mjini Magharibi tarehe :11 Juni 2024.

Aidha Rais Dk.Mwinyi ameeleza kuwa Serikali imetoa kibali cha kuajiri vijana waliokuwa wanajitolea katika mashirika mbalimbali ya Serikali ikiwemo Mamlaka ya Maji Zanzibar (ZAWA).

MOTO WATEKETEZA BWENI BUKOBA

 

Na Alodia Babara, Bukoba,

Bweni la wavulana katika shule ya sekondari Mugeza Mseto iliyopo kata ya Kahororo manispaa ya Bukoba mkoani Kagera limeteketea kwa moto na mali zote zilizokuwemo kuungulia humo chanzo cha moto huo bado hakijajulikana.

Kaimu kamanda wa jeshi la zima moto na uokoaji mkoa wa Kagera George Mrutu akizungumzia tukio hilo Juni 05, mwaka huu amethibitisha kutokea kwa tukio hilo na kusema kuwa, limetokea Juni 04, mwaka huu saa 8:15 usiku wakati wanafunzi wakiwa darasani wanajisomea.

Mrutu amesema kuwa, jeshi hilo lilipokea taarifa kupitia simu yao ya 114 kutoka kwa mkuu wa shule juu ya kuwepo tukio la moto katika shule hiyo ndipo kikosi cha zimamoto kilielekea eneo la tukio walifika na kukuta moto ukiwa umeshasambaa kwenye bweni zima na kuanza juhudi za kuuzima.

“Baada ya kufika tulikuta moto umeshasambaa bweni zima miali ya moto ikiwa inatokea madirishani moto umeshashika kwenye paa tulifanya juhudi za kuuzima moto huo ili usiendelee kuleta madhara, hatukuweza kubaini chochote kwa kuwa ilikuwa usiku hivyo tunaendelea na uchunguzi kuhusu tukio hili ili kubaini chanzo” amesema Mrutu.

Amemtaja mwangalizi wa wanafunzi (Matron) katika shule hiyo Savera Revelian ambaye alipata mshtuko na kukimbizwa hospitali.

Aidha ameongeza kuwa, bweni hilo lina uwezo wa kulaza wanafunzi 100 lakini wakati linaungua walikuwa wanalala wanafunzi 58 wa kidato cha pili 28 na kidato cha nne 30 kutokana na kwamba wengine wapo likizo.

Aidha Mrutu amezitaka shule zote kuwepo walinzi maeneo ya shule ili kuweza kudhibiti kama kuna watu wanaingia mabwenini wanafunzi wakiwa madarasani.

Kwa upande wake, afisa elimu sekondari manispaa ya Bukoba Frances Nshaija ameeleza kuwa, baada ya kufika eneo la tukio moto ulikuwa unaendelea kuzimwa na jeshi la zimamoto, yeye kwa kushirikiana na uongozi wa shule waliwaweka wanafunzi eneo salama la kulala.

Baadhi ya wananchi waliomba serikali kupitia jeshi la zimamoto na uokoaji baada ya kubaini chanzo cha moto huo waweke mikakati ya kudhibiti moto katika mabweni na kusababisha hasara.

Matukio ya moto kuunguza mabweni yamekuwa yakitokea mara kwa mara mkoani hapa ambapo mwaka jana lilitokea tukio la moto katika shule ya sekondari Omumwani na kuteketeza mali zote zilizokuwa katika bweni.

RUNALI YAWAJENGEA WAKULIMA KITUO CHA MALIPO RUANGWA

 

NA HADIJA OMARY, LINDI.

HATIMAYE ucheleweshwaji wa Fedha za malipo ya wakulima wa Wilaya ya Ruangwa wanaohudumiwa na chama kikuu cha Ushirika Runali kinachojumuisha wakulima wa Wilaya za Ruangwa, Liwale na Nachingwea mkoani Lindi, itabaki historia baada ya chama hicho kujenga kituo cha malipo kitakachotumika kuandaa na kuhakiki malipo ya wakulima hao kwa haraka zaidi.

Kituo hicho cha malipo kimejengwa katika Kata ya Lipande  Wilayani Ruangwa ambapo kimewekwa jiwe la msingi na Mkuu wa Mkoa wa Lindi Zainab Telack  na kuhudhuriwa na viongozi mbali mbali wa Serikali Wilayani humo pamoja na viongozi wa vyama vya Msingi, Amcos za Mkoa wa Lindi.

Akizungumza kwa niaba ya Mkuu wa Mkoa wa Lindi, Katibu Tawala wa Mkoa huo (RAS) Zuwena Omary baada ya kukagua jengo hilo na kuweka jiwe la msingi amekipongeza chama hicho kwa namna kinavyoendelea kuwekeza na kutoa huduma bora kwa wanachama wake kwa kuzikabili changamoto wanazokutana nazo.

Pamoja na pongezi hizo  pia aliutaka uongozi wa Bodi wa chama hicho cha Runali kutunza mradi huo na kuutumia kama walivyokusudia na kuendelea kusogeza  huduma hiyo katika maeneo ambayo yana wanachama wao na wakulima wengi zaidi.

Kwa mujibu wa Meneja Mkuu wa Chama kikuu cha Ushirika RUNALI, Jahida Hasani alisema kuwa ujenzi huo wa kituo cha malipo mpaka kukamilika kwake utagharimu Sh milioni 110  na kwamba kitaanza kutumiwa na viongozi hao katika msimu huu wa Ufuta.

" katika eneo hili pamoja na ujenzi wa kituo hiki umeenda sambamba na uwepo wa ghala kubwa lenye uwezo wa kuhifadhi mazao  tani elfu 10 kwa pamoja  lakini pia kama chama tunamuendelezo wa kujenga hivi vituo ambapo tumejenga Nachingwea,  tumejenga Liwale na sasa ni hapa Ruangwa "

Nae Mwenyekiti wa chama kikuu hicho Odas Mpunga amesema  kuwa lengo kubwa la kujenga kituo hicho ni kuendelea kuwaweka pamoja viongozi na watendaji wa vyama vya msingi (AMCOS) kuchakata na kurahisisha mchakato wa malipo ya wakulima.

Hata hivyo Mpunga ameeleza kuwa  chama hicho  kinaendelea na uwekezaji kwa kununua lori aina ya Scania lenye uwezo wa kubeba Tan 20 za mazao ya wakulima kwa pamoja kutoka shambani mpaka kwenye maghala.